sadiyan jin mein zinda hon wo sach bhi marne lagte hain

sadiyāñ jin meñ zinda hoñ vo sach bhī marne lagte haiñ

dhuup āñkhoñ tak aa jaa.e to ḳhvāb bikharne lagte haiñ

insānoñ ke ruup meñ jis dam saa.e bhaTkeñ saḌkoñ par

ḳhvāboñ se dil chehroñ se ā.īne Darne lagte haiñ

kyā ho jaatā hai in hañste jiite jāgte logoñ ko

baiThe baiThe kyuuñ ye ḳhud se bāteñ karne lagte haiñ

ishq kī apnī hī rasmeñ haiñ dost kī ḳhātir hāthoñ meñ

jītne vaale patte bhī hoñ phir bhī harne lagte haiñ

dekhe hue vo saare manzar na.e na.e dikhlā.ī deñ

Dhaltī umr kī sīḌhī se jab log utarne lagte haiñ

bedārī āsān nahīñ hai āñkheñ khulte hī 'amjad'

qadam qadam ham sapnoñ ke jurmāne bharne lagte haiñ

sadiyan jin mein zinda hon wo sach bhi marne lagte hain

dhup aankhon tak aa jae to KHwab bikharne lagte hain

insanon ke rup mein jis dam sae bhaTken saDkon par

KHwabon se dil chehron se aaine Darne lagte hain

kya ho jata hai in hanste jite jagte logon ko

baiThe baiThe kyun ye KHud se baaten karne lagte hain

ishq ki apni hi rasmen hain dost ki KHatir hathon mein

jitne wale patte bhi hon phir bhi harne lagte hain

dekhe hue wo sare manzar nae nae dikhlai den

Dhalti umr ki siDhi se jab log utarne lagte hain

bedari aasan nahin hai aankhen khulte hi 'amjad'

qadam qadam hum sapnon ke jurmane bharne lagte hain