sazishon ki bhiD mein tarikiyan sar par uThae

sāzishoñ kī bhiiḌ meñ tārīkiyāñ sar par uThā.e

baḌh rahe haiñ shaam ke saa.e dhuāñ sar par uThā.e

reg-zāroñ meñ bhaTaktī soch ke kuchh ḳhushk lamhe

talḳhi-e-hālāt kī haiñ dāstāñ sar par uThā.e

ḳhvāhishoñ kī aañch meñ tapte badan kī lazzateñ haiñ

aur vahshī raat hai gumrāhiyāñ sar par uThā.e

chand gūñgī dastakeñ haiñ ghar ke darvāze ke bāhar

chīḳh sannāToñ kī hai saarā makāñ sar par uThā.e

zehn meñ Thahrī huī hai ek āñdhī muddatoñ se

ham magar phirte rahe reg-e-ravāñ sar par uThā.e

ālam-e-lā-vārsī meñ jaane kab se dar-ba-dar huuñ

pusht par maazī ko laade qarz-e-jāñ sar par uThā.e

muztarib sī ruuh hai merī bhaTaktā phir rahā huuñ

maiñ ka.ī janmoñ se huuñ bār-e-girāñ sar par uThā.e

'rind' jab be-samtiyoñ meñ ḳhushk patte uḌ rahe hoñ

tohmateñ kis ke liye shām-e-ḳhizāñ sar par uThā.e

sazishon ki bhiD mein tarikiyan sar par uThae

baDh rahe hain sham ke sae dhuan sar par uThae

reg-zaron mein bhaTakti soch ke kuchh KHushk lamhe

talKHi-e-haalat ki hain dastan sar par uThae

KHwahishon ki aanch mein tapte badan ki lazzaten hain

aur wahshi raat hai gumrahiyan sar par uThae

chand gungi dastaken hain ghar ke darwaze ke bahar

chiKH sannaTon ki hai sara makan sar par uThae

zehn mein Thahri hui hai ek aandhi muddaton se

hum magar phirte rahe reg-e-rawan sar par uThae

aalam-e-la-warsi mein jaane kab se dar-ba-dar hun

pusht par mazi ko lade qarz-e-jaan sar par uThae

muztarib si ruh hai meri bhaTakta phir raha hun

main kai janmon se hun bar-e-giran sar par uThae

'rind' jab be-samtiyon mein KHushk patte uD rahe hon

tohmaten kis ke liye sham-e-KHizan sar par uThae