sahil tamam ashk-e-nadamat se aT gaya

sāhil tamām ashk-e-nadāmat se aT gayā

dariyā se koī shaḳhs to pyāsā palaT gayā

lagtā thā be-karāñ mujhe sahrā meñ āsmāñ

pahuñchā jo bastiyoñ meñ to ḳhānoñ meñ baT gayā

yā itnā saḳht-jān ki talvār be-asar

yā itnā narm-dil ki rag-e-gul se kaT gayā

bāñhoñ meñ aa sakā na havelī kā ik sutūn

putlī meñ merī aañkh kī sahrā simaT gayā

ab kaun jaa.e ku-e-malāmat ko chhoḌ kar

qadmoñ se aa ke apnā hī saaya lipaT gayā

gumbad kā kyā qusūr use kyuuñ kaho burā

aayā jidhar se tair udhar hī palaT gayā

rakhtā hai ḳhud se kaun harīfāna kashmakash

maiñ thā ki raat apne muqābil hī DaT gayā

jis kī amaañ meñ huuñ vahī uktā gayā na ho

būñdeñ ye kyuuñ barastī haiñ bādal to chhaT gayā

vo lamha-e-shu.ūr jise jāñkanī kaheñ

chehre se zindagī ke naqābeñ ulaT gayā

Thokar se merā paañv to zaḳhmī huā zarūr

raste meñ jo khaḌā thā vo kohsār haT gayā

ik hashr sā bapā thā mire dil meñ ai 'shakeb'

kholīñ jo khiḌkiyāñ to zarā shor ghaT gayā

sahil tamam ashk-e-nadamat se aT gaya

dariya se koi shaKHs to pyasa palaT gaya

lagta tha be-karan mujhe sahra mein aasman

pahuncha jo bastiyon mein to KHanon mein baT gaya

ya itna saKHt-jaan ki talwar be-asar

ya itna narm-dil ki rag-e-gul se kaT gaya

banhon mein aa saka na haweli ka ek sutun

putli mein meri aankh ki sahra simaT gaya

ab kaun jae ku-e-malamat ko chhoD kar

qadmon se aa ke apna hi saya lipaT gaya

gumbad ka kya qusur use kyun kaho bura

aaya jidhar se tair udhar hi palaT gaya

rakhta hai KHud se kaun harifana kashmakash

main tha ki raat apne muqabil hi DaT gaya

jis ki aman mein hun wahi ukta gaya na ho

bunden ye kyun barasti hain baadal to chhaT gaya

wo lamha-e-shuur jise jaankani kahen

chehre se zindagi ke naqaben ulaT gaya

Thokar se mera panw to zaKHmi hua zarur

raste mein jo khaDa tha wo kohsar haT gaya

ek hashr sa bapa tha mere dil mein ai 'shakeb'

kholin jo khiDkiyan to zara shor ghaT gaya