roun ki muskuraun main uske nasib par

ro.uuñ ki muskurā.ūñ maiñ us ke nasīb par

barsī hai ab kī baar ghaTā 'andalīb par

ik 'umr ho chukī hai ki maiñ jāñkanī meñ huuñ

'iisā ne chaar din na guzāre salīb par

rusvā.iyoñ se apne hī dāman ko bhar liyā

maiñ ne to ḳhaak bhī nahīñ Daalī raqīb par

us din se apne dil pe bharosa nahīñ rahā

jab duur kā gumān huā thā qarīb par

dil apnī aarzū ke gharauñde meñ hai asiir

raste tamām band hue haiñ ġharīb par

maḳhlūq ke saroñ se bhī mimbar buland hai

mushkil hai koī haath uThe ab ḳhatīb par

barse haiñ merī aañkh se aañsū shab-e-firāq

aur daaġh paḌ ga.e haiñ ridā-e-habīb par

roun ki muskuraun main us ke nasib par

barsi hai ab ki bar ghaTa 'andalib par

ek 'umr ho chuki hai ki main jaankani mein hun

'isa ne chaar din na guzare salib par

ruswaiyon se apne hi daman ko bhar liya

main ne to KHak bhi nahin Dali raqib par

us din se apne dil pe bharosa nahin raha

jab dur ka guman hua tha qarib par

dil apni aarzu ke gharaunde mein hai asir

raste tamam band hue hain gharib par

maKHluq ke saron se bhi mimbar buland hai

mushkil hai koi hath uThe ab KHatib par

barse hain meri aankh se aansu shab-e-firaq

aur dagh paD gae hain rida-e-habib par