ruKH-e-raushan dikhaiye sahab

ruḳh-e-raushan dikhā.iye sāhab

sham.a ko kuchh jalā.iye sāhab

ruuh ho kar samā.iye sāhab

mere qālib meñ aa.iye sāhab

shaiḳh-jī ho tumheñ surūd harām

aap apnī na gā.iye sāhab

vasl kī shab qarīb aa.ī hai

ab na mehñdī lagā.iye sāhab

ḳhūn-e-ushshāq hai ma.ānī meñ

shauq se paan khā.iye sāhab

maiñ tajallī-e-tūr dekhūñgā

aaj koThe pe aa.iye sāhab

aap dil meñ bigāḌ rakhte haiñ

bas na bāteñ banā.iye sāhab

chashm-e-tar rone par hai āmāda

aur sūkhī sunā.iye sāhab

bosa-e-ruḳh to chāhte ho 'saḳhī'

kahīñ muñh kī na khā.iye sāhab

ruKH-e-raushan dikhaiye sahab

shama ko kuchh jalaiye sahab

ruh ho kar samaiye sahab

mere qalib mein aaiye sahab

shaiKH-ji ho tumhein surud haram

aap apni na gaiye sahab

wasl ki shab qarib aai hai

ab na mehndi lagaiye sahab

KHun-e-ushshaq hai maani mein

shauq se pan khaiye sahab

main tajalli-e-tur dekhunga

aaj koThe pe aaiye sahab

aap dil mein bigaD rakhte hain

bas na baaten banaiye sahab

chashm-e-tar rone par hai aamada

aur sukhi sunaiye sahab

bosa-e-ruKH to chahte ho 'saKHi'

kahin munh ki na khaiye sahab