ruka jawab ki KHatir na kuchh sawal kiya

rukā javāb kī ḳhātir na kuchh savāl kiyā

magar ye zo.am ki har rābta bahāl kiyā

thakan nahīñ hai kaThin rāstoñ pe chalne kī

bichhaḌne vāloñ ke dukh ne bahut niDhāl kiyā

jo TūTnā thā faqat dard hī kā rishta thā

to dil ne kyuuñ bhalā is baat par malāl kiyā

bachā ke rakhnā thā ik aks apnī āñkhoñ meñ

baḌe jatan se unheñ ā.īna-misāl kiyā

lahū meñ tair ga.ī vo ghaḌī judā.ī kī

ki jis ke zahr ne jiinā mirā muhāl kiyā

bichhaḌ rahā thā magar muḌ ke dekhtā bhī rahā

maiñ muskurātī rahī maiñ ne bhī kamāl kiyā

ḳhabar thī us ko ki dasht-e-hunar se aa.ī huuñ

so us ke lafzoñ ne zaḳhmoñ kā indimāl kiyā

ruka jawab ki KHatir na kuchh sawal kiya

magar ye zoam ki har rabta bahaal kiya

thakan nahin hai kaThin raston pe chalne ki

bichhaDne walon ke dukh ne bahut niDhaal kiya

jo TuTna tha faqat dard hi ka rishta tha

to dil ne kyun bhala is baat par malal kiya

bacha ke rakhna tha ek aks apni aankhon mein

baDe jatan se unhen aaina-misal kiya

lahu mein tair gai wo ghaDi judai ki

ki jis ke zahr ne jina mera muhaal kiya

bichhaD raha tha magar muD ke dekhta bhi raha

main muskuraati rahi main ne bhi kamal kiya

KHabar thi us ko ki dasht-e-hunar se aai hun

so us ke lafzon ne zaKHmon ka indimal kiya