raunaq farogh-e-dard se kuchh anjuman mein hai

raunaq faroġh-e-dard se kuchh anjuman meñ hai

ḳhūn-e-jigar ġharīb kā har bāñkpan meñ hai

dīvāna zindagānī kā detā hai yuuñ subūt

bāhar lahad se hai kabhī ḳhūnīñ kafan meñ hai

dil ke lahū se ruuh kī hotī hai parvarish

me'rāj āgahī kī vafūr-e-mehan meñ hai

har buuñd nok-e-kilk kī detī hai dars-e-hosh

kaunain kā surāġh bhī batn-e-suḳhan meñ hai

do yak nafas hai ḳhema-e-gul kā fareb-e-rang

ibrat-farosh ḳhaar bhī sehn-e-chaman meñ hai

āfāq-sāz maz.hab-e-īsār phir se DhūñD

ik la.al-e-shab-charāġh bhī tāq-e-kuhan meñ hai

yaaro suḳhan barā-e-suḳhan mutlaqan 'abas

paiġhām-e-hast-o-būd kahīñ fikr-o-fan meñ hai

iḳhlās dil kā rahmat-e-bārī se kar talab

raushan charāġh-e-adl kahāñ anjuman meñ hai

bū-zar kā faqr hazrat-e-fārūq kā mizāj

asnām-sāz qaum ke sheḳh-e-zaman meñ hai

saudā-garī se maanā ki hāsil hai kuchh vaqār

sāmān-e-mufsidāt bhī taz.īn-e-tan meñ hai

asr-e-ravāñ ke log haiñ āvārgī-pasand

fitna bhī hirs-o-āz kā ḳhizr-e-zaman meñ hai

shabnam se pankhuḌī bhī sulagtī hai phuul kī

nairañgī-e-ḳhizāñ bhī bahār-e-chaman meñ hai

faizān-e-irtiqā se janāza ḳhulūs kā

ḳhair-ul-umam ke dosh pe shahr-e-zaman meñ hai

jamhūriyat bhī turfa-tamāsha kā kis qadar

lauh-o-qalam kī jaan yad-e-aharman meñ hai

is iftirā pe dījiye kuchh muftarī ko daad

jannat agar kahīñ hai to mere vatan meñ hai

jaane kise nasīb ho 'bebāk' āgahī

nāqid jadīd daur kā taḳhmīn-o-zan meñ hai

raunaq farogh-e-dard se kuchh anjuman mein hai

KHun-e-jigar gharib ka har bankpan mein hai

diwana zindagani ka deta hai yun subut

bahar lahad se hai kabhi KHunin kafan mein hai

dil ke lahu se ruh ki hoti hai parwarish

me'raj aagahi ki wafur-e-mehan mein hai

har bund nok-e-kilk ki deti hai dars-e-hosh

kaunain ka suragh bhi batn-e-suKHan mein hai

do yak nafas hai KHema-e-gul ka fareb-e-rang

ibrat-farosh KHar bhi sehn-e-chaman mein hai

aafaq-saz mazhab-e-isar phir se DhunD

ek lal-e-shab-charagh bhi taq-e-kuhan mein hai

yaro suKHan bara-e-suKHan mutlaqan 'abas

paigham-e-hast-o-bud kahin fikr-o-fan mein hai

iKHlas dil ka rahmat-e-bari se kar talab

raushan charagh-e-adl kahan anjuman mein hai

bu-zar ka faqr hazrat-e-faruq ka mizaj

asnam-saz qaum ke sheKH-e-zaman mein hai

sauda-gari se mana ki hasil hai kuchh waqar

saman-e-mufsidat bhi tazin-e-tan mein hai

asr-e-rawan ke log hain aawargi-pasand

fitna bhi hirs-o-az ka KHizr-e-zaman mein hai

shabnam se pankhuDi bhi sulagti hai phul ki

nairangi-e-KHizan bhi bahaar-e-chaman mein hai

faizan-e-irtiqa se janaza KHulus ka

KHair-ul-umam ke dosh pe shahr-e-zaman mein hai

jamhuriyat bhi turfa-tamasha ka kis qadar

lauh-o-qalam ki jaan yad-e-aharman mein hai

is iftira pe dijiye kuchh muftari ko dad

jannat agar kahin hai to mere watan mein hai

jaane kise nasib ho 'bebak' aagahi

naqid jadid daur ka taKHmin-o-zan mein hai