raat main is kashmakash mein ek pal soya nahin

raat maiñ is kashmakash meñ ek pal soyā nahīñ

kal maiñ jab jaane lagā to us ne kyuuñ rokā nahīñ

yuuñ agar sochūñ to ik ik naqsh hai siine pe naqsh

haa.e vo chehra ki phir bhī aañkh meñ bantā nahīñ

kyuuñ uḌātī phir rahī hai dar-ba-dar mujh ko havā

maiñ agar ik shāḳh se TuuTā huā pattā nahīñ

aaj tanhā huuñ to kitnā ajnabī māhaul hai

ek bhī raste ne tere shahr meñ rokā nahīñ

harf barg-e-ḳhushk ban kar TūTte girte rahe

ġhuncha-e-arz-e-tamannā hoñT par phūTā nahīñ

dard kā rasta hai yā hai sā.at-e-roz-e-hisāb

saikaḌoñ logoñ ko rokā ek bhī Thahrā nahīñ

shabnamī āñkhoñ ke jugnū kāñpte hoñToñ ke phuul

ek lamha thā jo 'amjad' aaj tak guzrā nahīñ

raat main is kashmakash mein ek pal soya nahin

kal main jab jaane laga to us ne kyun roka nahin

yun agar sochun to ek ek naqsh hai sine pe naqsh

hae wo chehra ki phir bhi aankh mein banta nahin

kyun uDati phir rahi hai dar-ba-dar mujh ko hawa

main agar ek shaKH se TuTa hua patta nahin

aaj tanha hun to kitna ajnabi mahaul hai

ek bhi raste ne tere shahr mein roka nahin

harf barg-e-KHushk ban kar TuTte girte rahe

ghuncha-e-arz-e-tamanna honT par phuTa nahin

dard ka rasta hai ya hai saat-e-roz-e-hisab

saikaDon logon ko roka ek bhi Thahra nahin

shabnami aankhon ke jugnu kanpte honTon ke phul

ek lamha tha jo 'amjad' aaj tak guzra nahin