raat humne jahan basar ki hai

raat ham ne jahāñ basar kī hai

ye kahānī usī shajar kī hai

ye sitāre yahāñ kahāñ se aa.e

ye to dahlīz mere ghar kī hai

niiñd kyā kījiye ki ā.ankhoñ meñ

ik na.ī jañg ḳhair o shar kī hai

mere kachche makān ke andar

aaj taqrīb chashm-e-tar kī hai

hijr kī shab guzar hī jā.egī

ye udāsī to umr bhar kī hai

ishq apnī jagah magar ham ne

muntaḳhab aur hī Dagar kī hai

uTh rahā hai dhuāñ mire ghar meñ

aag dīvār se udhar kī hai

ham ne apne vajūd kī chādar

tañg apne gumān par kī hai

vo sitāra-shanās aisā thā

yā kisī ne use ḳhabar kī hai

jā rahe ho kidhar 'rasā' mirzā

dekhte ho havā kidhar kī hai

raat hum ne jahan basar ki hai

ye kahani usi shajar ki hai

ye sitare yahan kahan se aae

ye to dahliz mere ghar ki hai

nind kya kijiye ki aaankhon mein

ek nai jang KHair o shar ki hai

mere kachche makan ke andar

aaj taqrib chashm-e-tar ki hai

hijr ki shab guzar hi jaegi

ye udasi to umr bhar ki hai

ishq apni jagah magar hum ne

muntaKHab aur hi Dagar ki hai

uTh raha hai dhuan mere ghar mein

aag diwar se udhar ki hai

hum ne apne wajud ki chadar

tang apne guman par ki hai

wo sitara-shanas aisa tha

ya kisi ne use KHabar ki hai

ja rahe ho kidhar 'rasa' mirza

dekhte ho hawa kidhar ki hai