raegan sab kuchh hua kaisi basirat kya hunar

rā.egāñ sab kuchh huā kaisī basīrat kyā hunar

gard gard apnī basīrat ḳhaak ḳhaak apnā hunar

jis taraf dekho hujūm-e-chehra-e-be-chehragāñ

kis ghane jañgal meñ yaaro gum huā sab kā hunar

ab hamārī muTThiyoñ meñ ek jugnū bhī nahīñ

chhīn kar be-rahm mausam le gayā saarā hunar

toḌ kar is ko bhī ab koī havā le jā.egī

ye jo barg-e-sabz ke mānind hai merā hunar

ab kahāñ dil ke lahū meñ bhīgī bhīgī āgahī

jeb meñ ham bhī liye phirte haiñ māñge kā hunar

dekhnā haiñ khelne vāloñ kī chābuk-dastiyāñ

taash kā pattā sahī merā hunar terā hunar

garmi-e-pahlū yahī tashkīk o lā-ilmī kī aañch

zauq-e-gumshudgī se ham haiñ bā-ḳhabar yā bā-hunar

bas yahī ḳhākistar-e-jāñ hai yahāñ apnī shanāḳht

ho gayā saarā badan jab raakh to chamkā hunar

shaḳhsiyat kā ye tavāzun terā hissa hai 'fazā'

jitnī saada hai tabī.at utnā hī tīkhā hunar

raegan sab kuchh hua kaisi basirat kya hunar

gard gard apni basirat KHak KHak apna hunar

jis taraf dekho hujum-e-chehra-e-be-chehragan

kis ghane jangal mein yaro gum hua sab ka hunar

ab hamari muTThiyon mein ek jugnu bhi nahin

chhin kar be-rahm mausam le gaya sara hunar

toD kar is ko bhi ab koi hawa le jaegi

ye jo barg-e-sabz ke manind hai mera hunar

ab kahan dil ke lahu mein bhigi bhigi aagahi

jeb mein hum bhi liye phirte hain mange ka hunar

dekhna hain khelne walon ki chabuk-dastiyan

tash ka patta sahi mera hunar tera hunar

garmi-e-pahlu yahi tashkik o la-ilmi ki aanch

zauq-e-gumshudgi se hum hain ba-KHabar ya ba-hunar

bas yahi KHakistar-e-jaan hai yahan apni shanaKHt

ho gaya sara badan jab rakh to chamka hunar

shaKHsiyat ka ye tawazun tera hissa hai 'faza'

jitni sada hai tabiat utna hi tikha hunar