qamat-e-yar ko hum yaad kiya karte hain

qāmat-e-yār ko ham yaad kiyā karte haiñ

sarv ko sadqe meñ āzād kiyā karte haiñ

zulf-e-shab-rañg ko ham yaad kiyā karte haiñ

shab-e-tārīk meñ fariyād kiyā karte haiñ

nigah-e-yār ko ham yaad kiyā karte haiñ

dekh kar barq ko fariyād kiyā karte haiñ

kūcha-e-yār ko ham yaad kiyā karte haiñ

jā ke gulzār meñ fariyād kiyā karte haiñ

ghar jo be-yār hai vīrāñ to tasavvur meñ mudām

ḳhāna-e-dil ko ham ābād kiyā karte haiñ

rashk se naam nahīñ lete ki sun le na koī

dil hī dil meñ use ham yaad kiyā karte haiñ

guzre haiñ kūcha-e-kākul se sabā ke jhoñke

nik.hat-e-gul ko jo barbād kiyā karte haiñ

hote haiñ jaate hī maktab meñ parī-rū ḳhūñ-rez

kyā ye jallādoñ ko ustād kiyā karte haiñ

phūñk deñ nāla-e-sozāñ se agar chāheñ qafas

ham faqat ḳhātir-e-sayyād kiyā karte haiñ

hotī hai āfat-e-ḳhat qahr-e-ḳhudā se nāzil

ye sanam ham pe jo bedād kiyā karte haiñ

malak-ul-maut agar kahiye unheñ to hai bajā

qatl be-teġh parī-zād kiyā karte haiñ

tū vo sayyād hai jo vaar ke tujh par lākhoñ

tā.er-e-rūh ko āzād kiyā karte haiñ

intiqām is kā kahīñ le na falak Dartā huuñ

jhūTe va.adoñ se jo vo shaad kiyā karte haiñ

terā dīvān hai kyā sāmne un ke 'nāsiḳh'

jo ki qur.ān pe īrād kiyā karte haiñ

qamat-e-yar ko hum yaad kiya karte hain

sarw ko sadqe mein aazad kiya karte hain

zulf-e-shab-rang ko hum yaad kiya karte hain

shab-e-tarik mein fariyaad kiya karte hain

nigah-e-yar ko hum yaad kiya karte hain

dekh kar barq ko fariyaad kiya karte hain

kucha-e-yar ko hum yaad kiya karte hain

ja ke gulzar mein fariyaad kiya karte hain

ghar jo be-yar hai viran to tasawwur mein mudam

KHana-e-dil ko hum aabaad kiya karte hain

rashk se nam nahin lete ki sun le na koi

dil hi dil mein use hum yaad kiya karte hain

guzre hain kucha-e-kakul se saba ke jhonke

nikhat-e-gul ko jo barbaad kiya karte hain

hote hain jate hi maktab mein pari-ru KHun-rez

kya ye jalladon ko ustad kiya karte hain

phunk den nala-e-sozan se agar chahen qafas

hum faqat KHatir-e-sayyaad kiya karte hain

hoti hai aafat-e-KHat qahr-e-KHuda se nazil

ye sanam hum pe jo bedad kiya karte hain

malak-ul-maut agar kahiye unhen to hai baja

qatl be-tegh pari-zad kiya karte hain

tu wo sayyaad hai jo war ke tujh par lakhon

taer-e-ruh ko aazad kiya karte hain

intiqam is ka kahin le na falak Darta hun

jhuTe wadon se jo wo shad kiya karte hain

tera diwan hai kya samne un ke 'nasiKH'

jo ki quran pe irad kiya karte hain