nim-cha jald myan hi na miyan kijiyega

nīm-chā jald myaañ hī na miyāñ kījiyegā

nīm-jānoñ kā abhī kaam ravāñ kījiyegā

tāqat-e-garmī-e-ḳhurshīd-e-qayāmat hai kise

taab kī dāġh-e-jigar se na fuġhāñ kījiyegā

dil meñ tum ho na jalāo mire dil ko dekho

merā nuqsān nahīñ apnā ziyāñ kījiyegā

kah do baqqāl pisar se ki mirā dil le kar

qasd-e-aḳhz-e-dil-e-aġhyār na haañ kījiyegā

dil se dil paas haiñ to bhī hai diloñ kī ḳhvāhish

kyā diloñ kī kahīñ dillī meñ dukāñ kījiyegā

aur bhī soz-e-jigar bazm meñ hogā raushan

sham.a saañ qat.a agar merī zabāñ kījiyegā

yaar jab saath safar meñ ho kahāñ kī rozī

roz rozoñ hī meñ īd-e-ramzāñ kījiyegā

kis se yārab kahūñ ahvāl ye kahtā hai vo but

apnī yaañ rām-kahānī na bayāñ kījiyegā

vo dhuāñ-dhār sī zulfeñ haiñ nazar meñ har shab

vird ab sura-e-vallail-o-duḳhāñ kījiyegā

shahr-e-dil kī tumheñ ābādī kā kuchh bhī hai ḳhayāl

yā jahāñ rahiyegā vīrāñ hī vahāñ kījiyegā

merī jānib se kaho mohtasib-e-shahr se ye

sa.ī-e-arzānī-e-mai az dil-o-jāñ kījiyegā

paanī pī pī ke tumheñ deveñge dushnām ye riñd

tum subuk hoge agar baada girāñ kījiyegā

jald 'ehsāñ' se kaho vo but-e-ḳhud-kām aayā

ab to lillāh kahīñ band zabāñ kījiyegā

nim-cha jald myan hi na miyan kijiyega

nim-jaanon ka abhi kaam rawan kijiyega

taqat-e-garmi-e-KHurshid-e-qayamat hai kise

tab ki dagh-e-jigar se na fughan kijiyega

dil mein tum ho na jalao mere dil ko dekho

mera nuqsan nahin apna ziyan kijiyega

kah do baqqal pisar se ki mera dil le kar

qasd-e-aKHz-e-dil-e-aghyar na han kijiyega

dil se dil pas hain to bhi hai dilon ki KHwahish

kya dilon ki kahin dilli mein dukan kijiyega

aur bhi soz-e-jigar bazm mein hoga raushan

shama san qata agar meri zaban kijiyega

yar jab sath safar mein ho kahan ki rozi

roz rozon hi mein id-e-ramzan kijiyega

kis se yarab kahun ahwal ye kahta hai wo but

apni yan ram-kahani na bayan kijiyega

wo dhuan-dhaar si zulfen hain nazar mein har shab

wird ab sura-e-wallail-o-duKHan kijiyega

shahr-e-dil ki tumhein aabaadi ka kuchh bhi hai KHayal

ya jahan rahiyega viran hi wahan kijiyega

meri jaanib se kaho mohtasib-e-shahr se ye

sai-e-arzani-e-mai az dil-o-jaan kijiyega

pani pi pi ke tumhein dewenge dushnam ye rind

tum subuk hoge agar baada giran kijiyega

jald 'ehsan' se kaho wo but-e-KHud-kaam aaya

ab to lillah kahin band zaban kijiyega