nazar kisi ko wo mu-e-kamar nahin aata

nazar kisī ko vo mū-e-kamar nahīñ aatā

ba-rañg-e-tār-e-nazar hai nazar nahīñ aatā

zamāna-e-ġham-e-furqat basar nahīñ aatā

ajal bhī aatī nahīñ yaar agar nahīñ aatā

hamesha huuñ bhī maiñ rotā ba-rañg-e-shabnam-o-abr

galī se kaun tire chashm-tar nahīñ aatā

ye hai nigāh se dar-parda teġh-zan qātil

ki iltiyām ye zaḳhm-e-jigar nahīñ aatā

ġham-e-firāq meñ mar mar ke roz jiitā huuñ

vo kaun shab hai jo muñh tak jigar nahīñ aatā

faqat na naam se chaltā hai kaam duniyā meñ

ki zer-e-sikka kabhī gul kā zar nahīñ aatā

vo laḌ ke milte nahīñ mil ke ham pakaḌte nahīñ

vo sulh karte nahīñ ham ko shar nahīñ aatā

firāq-e-zulf meñ roz uTh ke shab ko rotā huuñ

ki sar se gesū-e-shab tā-kamar nahīñ aatā

vo shāh-e-husn ḳhafā ho.e 'arsh' kahtā hai

girā jo paañv pe kyuuñ us kā sar nahīñ aatā

nazar kisi ko wo mu-e-kamar nahin aata

ba-rang-e-tar-e-nazar hai nazar nahin aata

zamana-e-gham-e-furqat basar nahin aata

ajal bhi aati nahin yar agar nahin aata

hamesha hun bhi main rota ba-rang-e-shabnam-o-abr

gali se kaun tere chashm-tar nahin aata

ye hai nigah se dar-parda tegh-zan qatil

ki iltiyam ye zaKHm-e-jigar nahin aata

gham-e-firaq mein mar mar ke roz jita hun

wo kaun shab hai jo munh tak jigar nahin aata

faqat na nam se chalta hai kaam duniya mein

ki zer-e-sikka kabhi gul ka zar nahin aata

wo laD ke milte nahin mil ke hum pakaDte nahin

wo sulh karte nahin hum ko shar nahin aata

firaq-e-zulf mein roz uTh ke shab ko rota hun

ki sar se gesu-e-shab ta-kamar nahin aata

wo shah-e-husn KHafa hoe 'arsh' kahta hai

gira jo panw pe kyun us ka sar nahin aata