nae dinon ke nae sahifon mein zikr-e-mehr-o-wafa nahin hai

na.e dinoñ ke na.e sahīfoñ meñ zikr-e-mehr-o-vafā nahīñ hai

mohabbatoñ kī jasāratoñ kī sazā nahīñ hai jazā nahīñ hai

nigāh ke shoḳh-pan ko begānagī kā aaseb Das gayā hai

muġhāyrat kā fusūñ-zada dil junūñ ke shāyāñ rahā nahīñ hai

koī bhī sajnī kisī bhī sājan kī muntazir hai na muztarib hai

tamām baam aur dar bujhe haiñ kahīñ bhī raushan diyā nahīñ hai

hayāt ke pur-jamāl manzar pe koī nutq aur qalam na mahkā

nayā qalamkār nudrat-e-fan kī ḳhushbuoñ par fidā nahīñ hai

yahīñ pe kal ham se tum se yaaro muaddatoñ ko janam milā thā

dayār-e-yārāñ vahī hai lekin koī vafā-āshnā nahīñ hai

visāl-ghaḌiyoñ firāq-lamhoñ ke ġham, tarab sab fasānche haiñ

milan kā aur nā-milan kā sukh dukh diloñ kī tah meñ chhupā nahīñ hai

maiñ dair o ka.aba meñ DhūñD aayā to maiñ ne paayā ye ilm o irfāñ

maiñ ek insāñ huuñ merī hastī se koī hastī varā nahīñ hai

vo chashm-e-bīnā kī manzileñ thiiñ ye kor-chashmī ke marhale haiñ

purānī pahchān mar ga.ī hai kisī se koī milā nahīñ hai

nae dinon ke nae sahifon mein zikr-e-mehr-o-wafa nahin hai

mohabbaton ki jasaraton ki saza nahin hai jaza nahin hai

nigah ke shoKH-pan ko beganagi ka aaseb Das gaya hai

mughayrat ka fusun-zada dil junun ke shayan raha nahin hai

koi bhi sajni kisi bhi sajan ki muntazir hai na muztarib hai

tamam baam aur dar bujhe hain kahin bhi raushan diya nahin hai

hayat ke pur-jamal manzar pe koi nutq aur qalam na mahka

naya qalamkar nudrat-e-fan ki KHushbuon par fida nahin hai

yahin pe kal hum se tum se yaro muaddaton ko janam mila tha

dayar-e-yaran wahi hai lekin koi wafa-ashna nahin hai

visal-ghaDiyon firaq-lamhon ke gham, tarab sab fasanche hain

milan ka aur na-milan ka sukh dukh dilon ki tah mein chhupa nahin hai

main dair o kaba mein DhunD aaya to main ne paya ye ilm o irfan

main ek insan hun meri hasti se koi hasti wara nahin hai

wo chashm-e-bina ki manzilen thin ye kor-chashmi ke marhale hain

purani pahchan mar gai hai kisi se koi mila nahin hai