nama-bar bhi wahan rasa na hua

nāma-bar bhī vahāñ rasā na huā

kisī sūrat mirā bhalā na huā

dard kī daad kaun de mujh ko

tū hī jab dard-āshnā na huā

vahī matlūb ho vahī tālib

ik muammā huā ḳhudā na huā

muḳhtasar bhī hai aur jaame bhī

kyā huā kā javāb kyā na huā

haañ kaho kuchh hameñ bhī ho ma.alūm

vo gila kyā jo barmalā na huā

ishq us dard kā nahīñ qaa.il

jo musībat kī intihā na huā

tum se takmīl-e-jaur ho na sakī

is adā kā bhī haq adā na huā

itnā pās-e-vafā to hai us ko

bevafā.ī se be-vafā na huā

dil-kushā thī nigāh-e-nāz us kī

tiir kyuuñ us kā dil-kushā na huā

dil kabhī ḳhush huā to thā lekin

is kā ab zikr kyā huā na huā

qābil-e-shukr hai vo sabr ai 'josh'

jo kabhī dast-e-iltijā na huā

nama-bar bhi wahan rasa na hua

kisi surat mera bhala na hua

dard ki dad kaun de mujh ko

tu hi jab dard-ashna na hua

wahi matlub ho wahi talib

ek muamma hua KHuda na hua

muKHtasar bhi hai aur jame bhi

kya hua ka jawab kya na hua

han kaho kuchh hamein bhi ho malum

wo gila kya jo barmala na hua

ishq us dard ka nahin qail

jo musibat ki intiha na hua

tum se takmil-e-jaur ho na saki

is ada ka bhi haq ada na hua

itna pas-e-wafa to hai us ko

bewafai se be-wafa na hua

dil-kusha thi nigah-e-naz us ki

tir kyun us ka dil-kusha na hua

dil kabhi KHush hua to tha lekin

is ka ab zikr kya hua na hua

qabil-e-shukr hai wo sabr ai 'josh'

jo kabhi dast-e-iltija na hua