na bhul kar bhi tamanna-e-rang-o-bu karte

na bhuul kar bhī tamannā-e-rañg-o-bū karte

chaman ke phuul agar terī aarzū karte

janāb-e-shaiḳh pahuñch jaate hauz-e-kausar tak

agar sharāb se mai-ḳhāne meñ vazū karte

masarrat aah tū bastī hai kin sitāroñ meñ

zamīñ pe umr huī terī justujū karte

ayāġh-e-bāda meñ aa kar vo ḳhud chhalak paḌtā

gar us ke mast zarā aur haao hū karte

unheñ mafar na thā iqrār-e-ishq se lekin

hayā ko zid thī ki vo pās-e-ābrū karte

pukār uThtā vo aa kar diloñ kī dhaḌkan meñ

ham apne siine meñ gar us kī justujū karte

ġham-e-zamāna ne majbūr kar diyā varna

ye aarzū thī ki bas terī aarzū karte

girāñ thā sāqi-e-daurāñ pe ek sāġhar bhī

to kis umiid pe ham ḳhvāhish-e-subū karte

junūn-e-ishq kī tāsīr to ye thī 'aḳhtar'

ki ham nahīñ vo ḳhud iz.hār-e-ārzū karte

na bhul kar bhi tamanna-e-rang-o-bu karte

chaman ke phul agar teri aarzu karte

janab-e-shaiKH pahunch jate hauz-e-kausar tak

agar sharab se mai-KHane mein wazu karte

masarrat aah tu basti hai kin sitaron mein

zamin pe umr hui teri justuju karte

ayagh-e-baada mein aa kar wo KHud chhalak paDta

gar us ke mast zara aur hao hu karte

unhen mafar na tha iqrar-e-ishq se lekin

haya ko zid thi ki wo pas-e-abru karte

pukar uThta wo aa kar dilon ki dhaDkan mein

hum apne sine mein gar us ki justuju karte

gham-e-zamana ne majbur kar diya warna

ye aarzu thi ki bas teri aarzu karte

giran tha saqi-e-dauran pe ek saghar bhi

to kis umid pe hum KHwahish-e-subu karte

junun-e-ishq ki tasir to ye thi 'aKHtar'

ki hum nahin wo KHud izhaar-e-arzu karte