na abr se tera saya na tu nikalta hai

na abr se tirā saaya na tū nikaltā hai

ġhubār-e-ā.īna-e-ābjū nikaltā hai

lahū kā rañg jhalaktā hai āñsuoñ meñ kahīñ

na ḳhāk-e-dil se sharār-e-numū nikaltā hai

is intishār meñ koī patā nahīñ chaltā

jo gard baiThe to ik dasht-e-hū nikaltā hai

chamak uThī haiñ khañDar kī shikasta dīvāreñ

kidhar se qāfila-e-rañg-o-bū nikaltā hai

na jaane kyā hai ki jab bhī maiñ us ko dekhtā huuñ

to koī aur mire rū-ba-rū nikaltā hai

liye-diye hue rakhtā hai ḳhud ko vo lekin

jahāñ bhī ġhaur se dekho rafū nikaltā hai

juḌā hai zaat se us kī har ek sher us kā

jo pattā shāḳh se toḌo lahū nikaltā hai

na dhund chhaTtī hai āñkhoñ ke sāmne se kabhī

na dil se hausla-e-justujū nikaltā hai

na chāñd ubhartā hai dīvār-e-shab se 'zeb' kahīñ

na sarv-e-ġham se qad-e-ārzū nikaltā hai

na abr se tera saya na tu nikalta hai

ghubar-e-aina-e-abju nikalta hai

lahu ka rang jhalakta hai aansuon mein kahin

na KHak-e-dil se sharar-e-numu nikalta hai

is intishaar mein koi pata nahin chalta

jo gard baiThe to ek dasht-e-hu nikalta hai

chamak uThi hain khanDar ki shikasta diwaren

kidhar se qafila-e-rang-o-bu nikalta hai

na jaane kya hai ki jab bhi main us ko dekhta hun

to koi aur mere ru-ba-ru nikalta hai

liye-diye hue rakhta hai KHud ko wo lekin

jahan bhi ghaur se dekho rafu nikalta hai

juDa hai zat se us ki har ek sher us ka

jo patta shaKH se toDo lahu nikalta hai

na dhund chhaTti hai aankhon ke samne se kabhi

na dil se hausla-e-justuju nikalta hai

na chand ubharta hai diwar-e-shab se 'zeb' kahin

na sarw-e-gham se qad-e-arzu nikalta hai