mujhse milne shab-e-gham aur to kaun aaega

mujh se milne shab-e-ġham aur to kaun aa.egā

merā saaya hai jo dīvār pe jam jā.egā

Thahro Thahro mire asnām-e-ḳhayālī Thahro

merā dil gosha-e-tanhā.ī meñ ghabrā.egā

log dete rahe kyā kyā na dilāse mujh ko

zaḳhm gahrā hī sahī zaḳhm hai bhar jā.egā

azm puḳhta hī sahī tark-e-vafā kā lekin

muntazir huuñ koī aa kar mujhe samjhā.egā

aañkh jhapke na kahīñ raah añdherī hī sahī

aage chal kar vo kisī moḌ pe mil jā.egā

dil sā anmol ratan kaun ḳharīdegā 'shakeb'

jab bikegā to ye be-dām hī bik jā.egā

mujh se milne shab-e-gham aur to kaun aaega

mera saya hai jo diwar pe jam jaega

Thahro Thahro mere asnam-e-KHayali Thahro

mera dil gosha-e-tanhai mein ghabraega

log dete rahe kya kya na dilase mujh ko

zaKHm gahra hi sahi zaKHm hai bhar jaega

azm puKHta hi sahi tark-e-wafa ka lekin

muntazir hun koi aa kar mujhe samjhaega

aankh jhapke na kahin rah andheri hi sahi

aage chal kar wo kisi moD pe mil jaega

dil sa anmol ratan kaun KHaridega 'shakeb'

jab bikega to ye be-dam hi bik jaega