muddaton ke baad phir kunj-e-hira raushan hua

muddatoñ ke baad phir kunj-e-hirā raushan huā

kis ke lab par dekhnā harf-e-duā raushan huā

ruuh ko ālā.ish-e-ġham se kabhī ḳhālī na rakh

yaanī be-zangār kis kā aa.inā raushan huā

ye tamāshā dīdanī Thahrā magar dekhegā kaun

ho ga.e ham raakh to dast-e-duā raushan huā

raat jañgal kā safar sab ham-safar bichhḌe hue

de na ham ko ye bashārat rāstā raushan huā

ḳhvāhishoñ ḳhvāboñ kā paikar hī sahī merā vajūd

ik sitāre kī haqīqat kyā bujhā raushan huā

bū-e-gul pattoñ meñ chhuptī phir rahī thī der se

nā-gahāñ shāḳhoñ meñ ik dast-e-sabā raushan huā

is qadar mazbūt mausam par rahī kis kī giraft

maiñ ki mujh se sīna-e-āb-o-havā raushan huā

ik zarā us se baḌhī qurbat to āñkheñ khul ga.iiñ

us ke mere biich thā jo fāslā raushan huā

vaqt ne kis aag meñ itnā jalāyā hai mujhe

jis qadar raushan thā maiñ us se sivā raushan huā

mujh ko merī āgahī āñkhoñ se ojhal kar ga.ī

us ne jo kuchh lauh-e-jāñ par likh diyā raushan huā

ai 'fazā' itnī kushāda kab thī ma.anī kī jihat

mere lafzoñ se ufuq ik dūsrā raushan huā

muddaton ke baad phir kunj-e-hira raushan hua

kis ke lab par dekhna harf-e-dua raushan hua

ruh ko aalaish-e-gham se kabhi KHali na rakh

yani be-zangar kis ka aaina raushan hua

ye tamasha didani Thahra magar dekhega kaun

ho gae hum rakh to dast-e-dua raushan hua

raat jangal ka safar sab ham-safar bichhDe hue

de na hum ko ye bashaarat rasta raushan hua

KHwahishon KHwabon ka paikar hi sahi mera wajud

ek sitare ki haqiqat kya bujha raushan hua

bu-e-gul patton mein chhupti phir rahi thi der se

na-gahan shaKHon mein ek dast-e-saba raushan hua

is qadar mazbut mausam par rahi kis ki giraft

main ki mujh se sina-e-ab-o-hawa raushan hua

ek zara us se baDhi qurbat to aankhen khul gain

us ke mere bich tha jo fasla raushan hua

waqt ne kis aag mein itna jalaya hai mujhe

jis qadar raushan tha main us se siwa raushan hua

mujh ko meri aagahi aankhon se ojhal kar gai

us ne jo kuchh lauh-e-jaan par likh diya raushan hua

ai 'faza' itni kushada kab thi mani ki jihat

mere lafzon se ufuq ek dusra raushan hua