mohabbat ki duniya mein mashhur kar dun

mohabbat kī duniyā meñ mash.hūr kar duuñ

mirī sāda-dil tujh ko maġhrūr kar duuñ

tire dil ko milne kī ḳhud aarzū ho

tujhe is qadar ġham se ranjūr kar duuñ

mujhe zindagī duur rakhtī hai tujh se

jo tū paas ho to use duur kar duuñ

mohabbat ke iqrār se sharm kab tak

kabhī sāmnā ho to majbūr kar duuñ

mire dil meñ hai shola-e-husn raqsāñ

maiñ chāhūñ to har zarre ko tuur kar duuñ

ye be-rañgiyāñ kab tak ai husn-e-rañgīñ

idhar aa tujhe ishq meñ chuur kar duuñ

tū gar sāmne ho to maiñ be-ḳhudī meñ

sitāroñ ko sajde pe majbūr kar duuñ

siyah-ḳhāna-e-ġham hai saaqī zamāna

bas ik jaam aur nuur hī nuur kar duuñ

nahīñ zindagī ko vafā varna 'aḳhtar'

mohabbat se duniyā ko māmūr kar duuñ

mohabbat ki duniya mein mashhur kar dun

meri sada-dil tujh ko maghrur kar dun

tere dil ko milne ki KHud aarzu ho

tujhe is qadar gham se ranjur kar dun

mujhe zindagi dur rakhti hai tujh se

jo tu pas ho to use dur kar dun

mohabbat ke iqrar se sharm kab tak

kabhi samna ho to majbur kar dun

mere dil mein hai shola-e-husn raqsan

main chahun to har zarre ko tur kar dun

ye be-rangiyan kab tak ai husn-e-rangin

idhar aa tujhe ishq mein chur kar dun

tu gar samne ho to main be-KHudi mein

sitaron ko sajde pe majbur kar dun

siyah-KHana-e-gham hai saqi zamana

bas ek jam aur nur hi nur kar dun

nahin zindagi ko wafa warna 'aKHtar'

mohabbat se duniya ko mamur kar dun