motabar se rishton ka saeban rahne do

mo'tabar se rishtoñ kā sā.ebān rahne do

mehrbāñ duāoñ meñ ḳhāndān rahne do

muzmahil se bām-o-dar ḳhasta-hāl dīvāreñ

baap kī nishānī hai vo makān rahne do

phailte hue shahro apnī vahshateñ roko

mere ghar ke āñgan par āsmān rahne do

aane vaalī nasleñ ḳhud hal talāsh kar leñgī

aaj ke masā.il ko ḳhush-gumān rahne do

uljhe uljhe resham kī Dor se bañdhe rishte

har ghaḌī mohabbat kā imtihān rahne do

kyā bahut zarūrī hai saarī baat kah Dāleñ

jugnuoñ se kuchh lamhe darmiyān rahne do

mo'tabar se rishton ka saeban rahne do

mehrban duaon mein KHandan rahne do

muzmahil se baam-o-dar KHasta-haal diwaren

bap ki nishani hai wo makan rahne do

phailte hue shahro apni wahshaten roko

mere ghar ke aangan par aasman rahne do

aane wali naslen KHud hal talash kar lengi

aaj ke masail ko KHush-guman rahne do

uljhe uljhe resham ki Dor se bandhe rishte

har ghaDi mohabbat ka imtihan rahne do

kya bahut zaruri hai sari baat kah Dalen

jugnuon se kuchh lamhe darmiyan rahne do