milun us se to milne ki nishani mang leta hun

milūñ us se to milne kī nishānī maañg letā huuñ

takalluf-bartaraf pyāsā huuñ paanī maañg letā huuñ

savāl-e-vasl kartā huuñ ki chamkā.ūñ lahū dil kā

maiñ apnā rañg bharne ko kahānī maañg letā huuñ

ye kyā ahl-e-havas kī tarah har shai māñgte rahnā

ki maiñ to sirf us kī mehrbānī maañg letā huuñ

vo sair-e-sub.h ke aalam meñ hotā hai to maiñ us se

ghaḌī bhar ke liye ḳhvāb-e-javānī maañg letā huuñ

jahāñ rukne lage mere dil-e-bīmār kī dhaḌkan

maiñ un qadmoñ se thoḌī sī ravānī maañg letā huuñ

mirā meyār merī bhī samajh meñ kuchh nahīñ aatā

na.e lamhoñ meñ tasvīreñ purānī maañg letā huuñ

ziyāñ-kārī 'zafar' buniyād hai merī tijārat kī

subuksārī ke badle sargirānī maañg letā huuñ

milun us se to milne ki nishani mang leta hun

takalluf-bartaraf pyasa hun pani mang leta hun

sawal-e-wasl karta hun ki chamkaun lahu dil ka

main apna rang bharne ko kahani mang leta hun

ye kya ahl-e-hawas ki tarah har shai mangte rahna

ki main to sirf us ki mehrbani mang leta hun

wo sair-e-subh ke aalam mein hota hai to main us se

ghaDi bhar ke liye KHwab-e-jawani mang leta hun

jahan rukne lage mere dil-e-bimar ki dhaDkan

main un qadmon se thoDi si rawani mang leta hun

mera meyar meri bhi samajh mein kuchh nahin aata

nae lamhon mein taswiren purani mang leta hun

ziyan-kari 'zafar' buniyaad hai meri tijarat ki

subuksari ke badle sargirani mang leta hun