mere chehre se gham aashkara nahin

mere chehre se ġham āshkārā nahīñ

ye na samjho ki meñ ġham kā maarā nahīñ

chashm-e-sāqī pe bhī haq hamārā nahīñ

ab ba-juz tark-e-mai koī chārā nahīñ

bahr-e-ġham meñ kisī kā sahārā nahīñ

ye koī āsmāñ kā sitārā nahīñ

Dūbne ko to Duube magar naaz hai

ahl-e-sāhil ko ham ne pukārā nahīñ

ġhuncha-o-gul ko chauñkā ga.ī hai ḳhizāñ

fasl-e-gul ne chaman ko sañvārā nahīñ

ġhair ke saath kis tarah dekhūñ tujhe

apnī qurbat bhī mujh ko gavārā nahīñ

yuuñ dikhātā hai āñkheñ hameñ bāġhbāñ

jaise gulshan pe kuchh haq hamārā nahīñ

zikr-e-sāqī hī kaafī nahīñ ai 'fanā'

be-piye mai-kade meñ guzārā nahīñ

mere chehre se gham aashkara nahin

ye na samjho ki mein gham ka mara nahin

chashm-e-saqi pe bhi haq hamara nahin

ab ba-juz tark-e-mai koi chaara nahin

bahr-e-gham mein kisi ka sahaara nahin

ye koi aasman ka sitara nahin

Dubne ko to Dube magar naz hai

ahl-e-sahil ko hum ne pukara nahin

ghuncha-o-gul ko chaunka gai hai KHizan

fasl-e-gul ne chaman ko sanwara nahin

ghair ke sath kis tarah dekhun tujhe

apni qurbat bhi mujh ko gawara nahin

yun dikhata hai aankhen hamein baghban

jaise gulshan pe kuchh haq hamara nahin

zikr-e-saqi hi kafi nahin ai 'fana'

be-piye mai-kade mein guzara nahin