haar jata hai jo har jiti si bazi ai KHuda

haar jaatā hai jo har jiitī sī baazī ai ḳhudā

dekh lī us ne tirī banda-navāzī ai ḳhudā

jab nahīñ mahmūd koī bhī rahā duniyā meñ to

phir bhī hai sochūñ kī kyuuñ aisī ayāzī ai ḳhudā

ḳhvāb meñ bhī ab jise paanā nahīñ mumkin rahā

bhuul paatā kyuuñ nahīñ apnā vo maazī ai ḳhudā

tū na chāhe jo vo mumkin hī nahīñ 'ālam meñ gar

biich meñ aatā hai kyuuñ terā ye qaazī ai ḳhudā

jo burā karte haiñ un kā tū bhalā kartā rahā

kyā samajh luuñ is ko terī jā’l-sāzī ai ḳhudā

gar har ik andesha merā terī hī taḳhlīq hai

dahriyat par merī phir tū kyuuñ hai raazī ai ḳhudā

haar jata hai jo har jiti si bazi ai KHuda

dekh li us ne teri banda-nawazi ai KHuda

jab nahin mahmud koi bhi raha duniya mein to

phir bhi hai sochun ki kyun aisi ayazi ai KHuda

KHwab mein bhi ab jise pana nahin mumkin raha

bhul pata kyun nahin apna wo mazi ai KHuda

tu na chahe jo wo mumkin hi nahin 'alam mein gar

bich mein aata hai kyun tera ye qazi ai KHuda

jo bura karte hain un ka tu bhala karta raha

kya samajh lun is ko teri ja’l-sazi ai KHuda

gar har ek andesha mera teri hi taKHliq hai

dahriyat par meri phir tu kyun hai raazi ai KHuda