mast aankhon ki qasam khane ka mausam aa gaya

mast āñkhoñ kī qasam khāne kā mausam aa gayā

jaam ko shīshe se Takrāne kā mausam aa gayā

'ismat-e-tauba ko Thukrāne kā mausam aa gayā

aa gayā pī kar bahak jaane kā mausam aa gayā

phir ghaTā chhā.ī bahak jaane kā mausam aa gayā

jaam kā shīshe kā paimāne kā mausam aa gayā

hashr kā paiġhām le kar uTh rahī hai chashm-e-dost

dil kī har dhaḌkan pe itrāne kā mausam aa gayā

ye fazā ye chāñdnī rāteñ ye daur-e-jām-o-mai

mastiyoñ meñ ġharq ho jaane kā mausam aa gayā

ho rahī haiñ jam' ik markaz pe dil kī vahshateñ

ham-nashīñ shāyad bahār aane kā mausam aa gayā

muskurātā hai koī chhup chhup ke dil kī aaḌ meñ

hasratoñ ke raqs farmāne kā mausam aa gayā

rafta rafta vāqi'āt-e-dard yaad aane lage

chupke chupke ashk barsāne kā mausam aa gayā

dil meñ 'aish-e-mai-kada añgḌā.iyāñ lene lagā

har ġham-e-duniyā ko Thukrāne kā mausam aa gayā

baḌh rahā hai ḳhud-ba-ḳhud 'iqbāl' josh-e-be-ḳhudī

'ālam-e-imkāñ pe chhā jaane kā mausam aa gayā

mast aankhon ki qasam khane ka mausam aa gaya

jam ko shishe se Takrane ka mausam aa gaya

'ismat-e-tauba ko Thukrane ka mausam aa gaya

aa gaya pi kar bahak jaane ka mausam aa gaya

phir ghaTa chhai bahak jaane ka mausam aa gaya

jam ka shishe ka paimane ka mausam aa gaya

hashr ka paigham le kar uTh rahi hai chashm-e-dost

dil ki har dhaDkan pe itrane ka mausam aa gaya

ye faza ye chandni raaten ye daur-e-jam-o-mai

mastiyon mein gharq ho jaane ka mausam aa gaya

ho rahi hain jam' ek markaz pe dil ki wahshaten

ham-nashin shayad bahaar aane ka mausam aa gaya

muskuraata hai koi chhup chhup ke dil ki aaD mein

hasraton ke raqs farmane ka mausam aa gaya

rafta rafta waqi'at-e-dard yaad aane lage

chupke chupke ashk barsane ka mausam aa gaya

dil mein 'aish-e-mai-kada angDaiyan lene laga

har gham-e-duniya ko Thukrane ka mausam aa gaya

baDh raha hai KHud-ba-KHud 'iqbaal' josh-e-be-KHudi

'alam-e-imkan pe chha jaane ka mausam aa gaya