hain safa-e-baada-o-durd-e-tah-e-paimana hum

haiñ safā-e-bāda-o-durd-e-tah-e-paimāna ham

nūr-e-sham’-e-majlis-o-soz-e-dil-e-parvāna ham

jān-e-'aql-e-kāmil-o-shor-e-sar-e-dīvānagāñ

raunaq ābādī kī haiñ aur vahshat-e-vīrāna ham

chashm-e-shaiḳh-o-barhaman meñ hai hameñ juuñ surma jā

gard-e-rāh-e-kā’ba-o-ḳhāk-e-dar-e-but-ḳhāna ham

faiz se mastī ke dekhā ham ne ghar allāh kā

jā rahe masjid meñ shab gum-karda-e-mai-ḳhāna ham

vā'izā soz-e-jahannam se Darātā hai kise

daabe phirte haiñ baġhal meñ dil sā ātish-ḳhāna ham

dostī kā ġhair ke kyā zikr is dil meñ ki dost

āshnā.ī meñ tirī haiñ aap se begāna ham

hain safa-e-baada-o-durd-e-tah-e-paimana hum

nur-e-sham’-e-majlis-o-soz-e-dil-e-parwana hum

jaan-e-'aql-e-kaamil-o-shor-e-sar-e-diwanagan

raunaq aabaadi ki hain aur wahshat-e-virana hum

chashm-e-shaiKH-o-barhaman mein hai hamein jun surma ja

gard-e-rah-e-ka’ba-o-KHak-e-dar-e-but-KHana hum

faiz se masti ke dekha hum ne ghar allah ka

ja rahe masjid mein shab gum-karda-e-mai-KHana hum

wa'iza soz-e-jahannam se Daraata hai kise

dabe phirte hain baghal mein dil sa aatish-KHana hum

dosti ka ghair ke kya zikr is dil mein ki dost

aashnai mein teri hain aap se begana hum