hamare raste mein koi majburi nahin aati

hamāre rāste meñ koī majbūrī nahīñ aatī

ḳhudā kā shukr hai duniyā hameñ puurī nahīñ aatī

yahāñ sāñseñ kamāne kā bhī itnā bojh hotā hai

mashaqqat jism khā jaatī hai mazdūrī nahīñ aatī

maiñ un ko ek duuje kī bhalī bāteñ batātā huuñ

sunā hai is tarah logoñ meñ maġhrūrī nahīñ aatī

mujhe darpesh hai ghar meñ basī duniyā kī rakhvālī

magar daftar se ik afsar kī manzūrī nahīñ aatī

jo sajdoñ meñ rakhe jaa.eñ vo nezoñ par bhī aate haiñ

ḳhudā ke nām-levāoñ pe mā'zūrī nahīñ aatī

maiñ us majma' kā hissa huuñ jahāñ logoñ ke hisse meñ

badan par puure kapḌe hoñ to mash.hūrī nahīñ aatī

bahut nazdīk honā bhī vafā kā 'aib hai 'hāris'

zarā se fāsle par darmiyāñ duurī nahīñ aatī

hamare raste mein koi majburi nahin aati

KHuda ka shukr hai duniya hamein puri nahin aati

yahan sansen kamane ka bhi itna bojh hota hai

mashaqqat jism kha jati hai mazduri nahin aati

main un ko ek duje ki bhali baaten batata hun

suna hai is tarah logon mein maghruri nahin aati

mujhe darpesh hai ghar mein basi duniya ki rakhwali

magar daftar se ek afsar ki manzuri nahin aati

jo sajdon mein rakhe jaen wo nezon par bhi aate hain

KHuda ke nam-lewaon pe ma'zuri nahin aati

main us majma' ka hissa hun jahan logon ke hisse mein

badan par pure kapDe hon to mashhuri nahin aati

bahut nazdik hona bhi wafa ka 'aib hai 'haaris'

zara se fasle par darmiyan duri nahin aati