maine yun dekha use jaise kabhi dekha na tha

maiñ ne yuuñ dekhā use jaise kabhī dekhā na thā

aur jab dekhā to āñkhoñ par yaqīñ aatā na thā

bām-o-dar se saḳht bārish meñ bhī uTThegā dhuāñ

yuuñ bhī hotā hai mohabbat meñ kabhī sochā na thā

āñdhiyoñ ko rauzan-e-zindāñ se ham dekhā kiye

duur tak phailā huā sahrā thā naqsh-e-pā na thā

log laa.e haiñ kahāñ se shab ko marmar ke charāġh

un chaTānoñ meñ to din ko rāsta paidā na thā

shahr kī hañgāma-ārā.ī meñ kho kar rah gayā

maiñ ki apne ghar meñ bhī mujh ko sukūñ miltā na thā

barf apne-āp ghul jaatī hai sūraj ho na ho

shaam se pahle ye jaanā thā magar samjhā na thā

un dinoñ bhī shahr meñ sailāb aate the bahut

vādiyoñ meñ jab kahīñ bādal abhī barsā na thā

raat kī tanhā.iyoñ meñ jis se chauñk uTThe the ham

apnī hī āvāz thī sho.ala koī chamkā na thā

vo bhī sach kahte haiñ 'aḳhtar' log begāne hue

ham bhī sachche haiñ ki duniyā kā chalan aisā na thā

main ne yun dekha use jaise kabhi dekha na tha

aur jab dekha to aankhon par yaqin aata na tha

baam-o-dar se saKHt barish mein bhi uTThega dhuan

yun bhi hota hai mohabbat mein kabhi socha na tha

aandhiyon ko rauzan-e-zindan se hum dekha kiye

dur tak phaila hua sahra tha naqsh-e-pa na tha

log lae hain kahan se shab ko marmar ke charagh

un chaTanon mein to din ko rasta paida na tha

shahr ki hangama-arai mein kho kar rah gaya

main ki apne ghar mein bhi mujh ko sukun milta na tha

barf apne-ap ghul jati hai suraj ho na ho

sham se pahle ye jaana tha magar samjha na tha

un dinon bhi shahr mein sailab aate the bahut

wadiyon mein jab kahin baadal abhi barsa na tha

raat ki tanhaiyon mein jis se chaunk uTThe the hum

apni hi aawaz thi shoala koi chamka na tha

wo bhi sach kahte hain 'aKHtar' log begane hue

hum bhi sachche hain ki duniya ka chalan aisa na tha