main nazar se ek andaz-e-nazar hota hua

maiñ nazar se ek andāz-e-nazar hotā huā

kaun hai din raat mujh meñ be-ḳhabar hotā huā

khultā jaatā hai samundar bādbāñ-dar-bādbāñ

maiñ safar kartā huā mujh se safar hotā huā

ek vus.at āsmāñ-dar-āsmāñ baḌhtī huī

ik parinda bāl-o-par meñ tar-ba-tar hotā huā

ek pahnā.ī makāñ se lā-makāñ hotī huī

ek lamha muḳhtasar se muḳhtasar hotā huā

ek añgḌā.ī se saare shahr ko niiñd aa ga.ī

ye tamāshā maiñ ne dekhā baam par hotā huā

khīñch lī kis ne tanāb-e-ḳhema-e-sidq-o-safā

kaun hai is dasht-e-ġham meñ be-hunar hotā huā

main nazar se ek andaz-e-nazar hota hua

kaun hai din raat mujh mein be-KHabar hota hua

khulta jata hai samundar baadban-dar-baadban

main safar karta hua mujh se safar hota hua

ek wusat aasman-dar-asman baDhti hui

ek parinda baal-o-par mein tar-ba-tar hota hua

ek pahnai makan se la-makan hoti hui

ek lamha muKHtasar se muKHtasar hota hua

ek angDai se sare shahr ko nind aa gai

ye tamasha main ne dekha baam par hota hua

khinch li kis ne tanab-e-KHema-e-sidq-o-safa

kaun hai is dasht-e-gham mein be-hunar hota hua