main apne aapko pahchan hi nahin paya

maiñ apne aap ko pahchān hī nahīñ paayā

isī liye maiñ tujhe jaan hī nahīñ paayā

ye dekh kar vo pareshāñ hai terī mahfil meñ

kisī ko us ne pareshān hī nahīñ paayā

abhī se tujh ko paḌī hai visāl kī mirī jaañ

abhī to hijr ne unvān hī nahīñ paayā

vo ek lamha mirī zindagī pe taarī hai

jo ek lamha abhī aan hī nahīñ paayā

ḳhushī ḳhushī tirī duniyā ko chhoḌ aa.e ham

ḳhushī kā jab koī sāmān hī nahīñ paayā

javāz mil na sakā mujh ko apne hone kā

so apne aap ko insān hī nahīñ paayā

ajiib hijr kiyā ham ne hijr meñ 'momin'

visāl-e-yār kā armān hī nahīñ paayā

main apne aap ko pahchan hi nahin paya

isi liye main tujhe jaan hi nahin paya

ye dekh kar wo pareshan hai teri mahfil mein

kisi ko us ne pareshan hi nahin paya

abhi se tujh ko paDi hai visal ki meri jaan

abhi to hijr ne unwan hi nahin paya

wo ek lamha meri zindagi pe tari hai

jo ek lamha abhi aan hi nahin paya

KHushi KHushi teri duniya ko chhoD aae hum

KHushi ka jab koi saman hi nahin paya

jawaz mil na saka mujh ko apne hone ka

so apne aap ko insan hi nahin paya

ajib hijr kiya hum ne hijr mein 'momin'

visal-e-yar ka arman hi nahin paya