mai-e-be-rang ka sau rang se ruswa hona

mai-e-be-rañg kā sau rañg se rusvā honā

kabhī mai-kash kabhī saaqī kabhī miinā honā

az azal tā-ba abad mahv-e-tamāshā honā

maiñ vo huuñ jisko na marnā hai na paidā honā

saare aalam meñ hai betābī o shorish barpā

haa.e us shoḳh kā ham-shakl-e-tamannā honā

fasl-e-gul kyā hai ye merāj hai aab o gil kī

merī rag rag ko mubārak rag-e-saudā honā

keh ke kuchh laala o gul rakh liyā parda maiñ ne

mujhse dekhā na gayā husn kā rusvā honā

jalva-e-husn ko hai chashm-e-tahayyur kī talab

kis kī qismat meñ hai mahrūm-e-tamāshā honā

dahr hī se vo numāyāñ bhī hai pinhāñ bhī hai

jaise sahbā ke liye parda-e-mīnā honā

terī shoḳhī terī nairañg adaa.ī ke nisār

ik na.ī jaan hai tajdīd-e-tamannā honā

husn ke saath hai begāna-nigāhī kā maza

qahr hai qahr magar arz-e-tamannā honā

is se baḌh kar koī be-rāh-ravī kyā hogī

gām-e-pur-shauq kā manzil se shanāsā honā

mā.il-e-sher-o-ġhazal phir hai tabī.at 'asġhar'

abhī kuchh aur muqaddar meñ hai rusvā honā

mai-e-be-rang ka sau rang se ruswa hona

kabhi mai-kash kabhi saqi kabhi mina hona

az azal ta-ba abad mahw-e-tamasha hona

main wo hun jisko na marna hai na paida hona

sare aalam mein hai betabi o shorish barpa

hae us shoKH ka ham-shakl-e-tamanna hona

fasl-e-gul kya hai ye meraj hai aab o gil ki

meri rag rag ko mubarak rag-e-sauda hona

keh ke kuchh lala o gul rakh liya parda main ne

mujhse dekha na gaya husn ka ruswa hona

jalwa-e-husn ko hai chashm-e-tahayyur ki talab

kis ki qismat mein hai mahrum-e-tamasha hona

dahr hi se wo numayan bhi hai pinhan bhi hai

jaise sahba ke liye parda-e-mina hona

teri shoKHi teri nairang adai ke nisar

ek nai jaan hai tajdid-e-tamanna hona

husn ke sath hai begana-nigahi ka maza

qahr hai qahr magar arz-e-tamanna hona

is se baDh kar koi be-rah-rawi kya hogi

gam-e-pur-shauq ka manzil se shanasa hona

mail-e-sher-o-ghazal phir hai tabiat 'asghar'

abhi kuchh aur muqaddar mein hai ruswa hona