lahu mein rang lahrane lage hain

lahū meñ rang lahrāne lage haiñ

zamāne ḳhud ko duhrāne lage haiñ

paroñ meñ le ke be-hāsil uḌāneñ

parinde lauT kar aane lage haiñ

kahāñ hai qāfila bād-e-sabā kā

diloñ ke phuul murjhāne lage haiñ

khule jo ham-nashīnoñ ke garebāñ

ḳhud apne zaḳhm afsāne lage haiñ

kuchh aisā dard thā bāñg-e-jaras meñ

safar se qabl pachhtāne lage haiñ

kuchh aisī be-yaqīnī thī fazā meñ

jo apne the vo begāne lage haiñ

havā kā rang niilā ho rahā hai

chaman meñ saañp lahrāne lage haiñ

falak ke khet meñ khilte sitāre

zamīñ par aag barsāne lage haiñ

lab-e-zanjīr hai tā'bīr jin kī

vo sapne phir nazar aane lage haiñ

khulā hai raat kā tārīk jangal

aur andhe raah dikhlāne lage haiñ

chaman kī baaḌ thī jin kā Thikāna

dil-e-shabnam ko dhaḌkāne lage haiñ

bachāne aa.e the dīvār lekin

'imārat hī ko ab Dhāne lage haiñ

ḳhudā kā ghar tumhīñ samjho to samjho

hameñ to ye sanam-ḳhāne lage haiñ

lahu mein rang lahrane lage hain

zamane KHud ko duhrane lage hain

paron mein le ke be-hasil uDanen

parinde lauT kar aane lage hain

kahan hai qafila baad-e-saba ka

dilon ke phul murjhane lage hain

khule jo ham-nashinon ke gareban

KHud apne zaKHm afsane lage hain

kuchh aisa dard tha bang-e-jaras mein

safar se qabl pachhtane lage hain

kuchh aisi be-yaqini thi faza mein

jo apne the wo begane lage hain

hawa ka rang nila ho raha hai

chaman mein sanp lahrane lage hain

falak ke khet mein khilte sitare

zamin par aag barsane lage hain

lab-e-zanjir hai ta'bir jin ki

wo sapne phir nazar aane lage hain

khula hai raat ka tarik jangal

aur andhe rah dikhlane lage hain

chaman ki baD thi jin ka Thikana

dil-e-shabnam ko dhaDkane lage hain

bachane aae the diwar lekin

'imarat hi ko ab Dhane lage hain

KHuda ka ghar tumhin samjho to samjho

hamein to ye sanam-KHane lage hain