kya kya nazar ko shauq-e-hawas dekhne mein tha

kyā kyā nazar ko shauq-e-havas dekhne meñ thā

dekhā to har jamāl isī aa.ine meñ thā

qulzum ne baḌh ke chuum liye phuul se qadam

dariyā-e-rañg-o-nūr abhī rāste meñ thā

ik mauj-e-ḳhūn-e-ḳhalq thī kis kī jabīñ pe thī

ik tauq-e-fard-e-jurm thā kis ke gale meñ thā

ik rishta-e-vafā thā so kis nā-shanās se

ik dard hirz-e-jāñ thā so kis ke sile meñ thā

sahbā-e-tund-o-tez kī hiddat ko kyā ḳhabar

shīshe se pūchhiye jo mazā TūTne meñ thā

kyā kyā rahe haiñ harf o hikāyat ke silsile

vo kam-suḳhan nahīñ thā magar dekhne meñ thā

taa.ib the ehtisāb se jab saare bāda-kash

mujh ko ye iftiḳhār ki maiñ mai-kade meñ thā

kya kya nazar ko shauq-e-hawas dekhne mein tha

dekha to har jamal isi aaine mein tha

qulzum ne baDh ke chum liye phul se qadam

dariya-e-rang-o-nur abhi raste mein tha

ek mauj-e-KHun-e-KHalq thi kis ki jabin pe thi

ek tauq-e-fard-e-jurm tha kis ke gale mein tha

ek rishta-e-wafa tha so kis na-shanas se

ek dard hirz-e-jaan tha so kis ke sile mein tha

sahba-e-tund-o-tez ki hiddat ko kya KHabar

shishe se puchhiye jo maza TuTne mein tha

kya kya rahe hain harf o hikayat ke silsile

wo kam-suKHan nahin tha magar dekhne mein tha

taib the ehtisab se jab sare baada-kash

mujh ko ye iftiKHar ki main mai-kade mein tha