kuchh kahne ka waqt nahin ye kuchh na kaho KHamosh raho

kuchh kahne kā vaqt nahīñ ye kuchh na kaho ḳhāmosh raho

ai logo ḳhāmosh raho haañ ai logo ḳhāmosh raho

sach achchhā par us ke jilau meñ zahr kā hai ik pyāla bhī

pāgal ho kyuuñ nāhaq ko suqrāt bano ḳhāmosh raho

un kā ye kahnā sūraj hī dhartī ke phere kartā hai

sar-āñkhoñ par sūraj hī ko ghūmne do ḳhāmosh raho

mahbas meñ kuchh habs hai aur zanjīr kā aahan chubhtā hai

phir socho haañ phir socho haañ phir socho ḳhāmosh raho

garm aañsū aur ThanDī aaheñ man meñ kyā kyā mausam haiñ

is bagiyā ke bhed na kholo sair karo ḳhāmosh raho

āñkheñ muuñd kināre baiTho man ke rakkho band kivāḌ

'inshā'-jī lo dhāgā lo aur lab sī lo ḳhāmosh raho

kuchh kahne ka waqt nahin ye kuchh na kaho KHamosh raho

ai logo KHamosh raho han ai logo KHamosh raho

sach achchha par us ke jilau mein zahr ka hai ek pyala bhi

pagal ho kyun nahaq ko suqraat bano KHamosh raho

un ka ye kahna suraj hi dharti ke phere karta hai

sar-ankhon par suraj hi ko ghumne do KHamosh raho

mahbas mein kuchh habs hai aur zanjir ka aahan chubhta hai

phir socho han phir socho han phir socho KHamosh raho

garm aansu aur ThanDi aahen man mein kya kya mausam hain

is bagiya ke bhed na kholo sair karo KHamosh raho

aankhen mund kinare baiTho man ke rakkho band kiwaD

'insha'-ji lo dhaga lo aur lab si lo KHamosh raho