kuchh had bhi ai falak sitam-e-na-rawa ki hai

kuchh had bhī ai falak sitam-e-nā-ravā kī hai

har saañs dāstāñ tire jaur-o-jafā kī hai

hājat-ravā kī aur na zarūrat duā kī hai

ab chhoḌ chārasāz jo marzī ḳhudā kī hai

dāmān-e-zabt chaak to kar de junūñ magar

tauhīn ye mire dil-e-ġham-āshnā kī hai

ḳhūn-e-hayāt ḳhūn-e-tarab ḳhūn-e-ārzū

ye sharah-e-muḳhtasar mirī umr-e-vafā kī hai

ġhairat ne merī ḳhud hī safīna Dubo diyā

dekhā nazar phirī huī kuchh nāḳhudā kī hai

barbādiyoñ se dars-e-baqā le rahī huuñ maiñ

ye sunnat-e-kuhan shah-e-karb-o-balā kī hai

irfān-e-ġham se nafs kā irfāñ huā nasīb

sīḌhī ye pahlī ma.arifat-e-kibriyā kī hai

ham se ḳhizāñ-nasīb qafas meñ bhī shaad haiñ

laa.ī jo bū-e-gul ye ināyat sabā kī hai

ḳhuddāriyoñ ne ziist ko āsāñ banā diyā

betābiyoñ kī ḳhū hai na āh-o-bakā kī hai

maanā ki tujh ko aish kī jannat nasīb hai

tahqīr-e-ġham na kar ki ye ne.amat ḳhudā kī hai

is zindagī ne saath kisī kā nahīñ diyā

kis bevafā se tujh ko tamannā vafā kī hai

kashtī ko merī maujoñ se pahuñchā nahīñ guzar

minnat-gudāz ye karam-e-nāḳhudā kī hai

'maḳhfī' panāh-e-chādar-e-zehrā na chhoḌnā

ta.alīm-e-nau sunā hai ki dushman hayā kī hai

kuchh had bhi ai falak sitam-e-na-rawa ki hai

har sans dastan tere jaur-o-jafa ki hai

hajat-rawa ki aur na zarurat dua ki hai

ab chhoD chaarasaz jo marzi KHuda ki hai

daman-e-zabt chaak to kar de junun magar

tauhin ye mere dil-e-gham-ashna ki hai

KHun-e-hayat KHun-e-tarab KHun-e-arzu

ye sharah-e-muKHtasar meri umr-e-wafa ki hai

ghairat ne meri KHud hi safina Dubo diya

dekha nazar phiri hui kuchh naKHuda ki hai

barbaadiyon se dars-e-baqa le rahi hun main

ye sunnat-e-kuhan shah-e-karb-o-bala ki hai

irfan-e-gham se nafs ka irfan hua nasib

siDhi ye pahli marifat-e-kibriya ki hai

hum se KHizan-nasib qafas mein bhi shad hain

lai jo bu-e-gul ye inayat saba ki hai

KHuddariyon ne zist ko aasan bana diya

betabiyon ki KHu hai na aah-o-baka ki hai

mana ki tujh ko aish ki jannat nasib hai

tahqir-e-gham na kar ki ye neamat KHuda ki hai

is zindagi ne sath kisi ka nahin diya

kis bewafa se tujh ko tamanna wafa ki hai

kashti ko meri maujon se pahuncha nahin guzar

minnat-gudaz ye karam-e-naKHuda ki hai

'maKHfi' panah-e-chadar-e-zehra na chhoDna

talim-e-nau suna hai ki dushman haya ki hai