koi to aa ke rula de ki hans raha hun main

koī to aa ke rulā de ki hañs rahā huuñ maiñ

bahut dinoñ se ḳhushī ko taras rahā huuñ maiñ

sahar kī os meñ bhīgā huā badan terā

vo aañch hai ki chaman meñ jhulas rahā huuñ maiñ

qadam qadam pe bikhartā chalā huuñ sahrā meñ

sadā kī tarah makīn-e-jaras rahā huuñ maiñ

koī ye kah de mirī aarzū ke motī se

sadaf sadaf kī qasam hai baras rahā huuñ maiñ

hayāt-e-ishq mujhe aaj ajnabī na samajh

ki saaya saaya tire pesh-o-pas rahā huuñ maiñ

nafas kī āmad-o-shud bhī hai sānehe kī tarah

gavāh rah ki tirā ham-nafas rahā huuñ maiñ

jahāñ bhī nuur milā khil uThā shafaq kī tarah

jahāñ bhī aag milī ḳhār-o-ḳhas rahā huuñ maiñ

koi to aa ke rula de ki hans raha hun main

bahut dinon se KHushi ko taras raha hun main

sahar ki os mein bhiga hua badan tera

wo aanch hai ki chaman mein jhulas raha hun main

qadam qadam pe bikharta chala hun sahra mein

sada ki tarah makin-e-jaras raha hun main

koi ye kah de meri aarzu ke moti se

sadaf sadaf ki qasam hai baras raha hun main

hayat-e-ishq mujhe aaj ajnabi na samajh

ki saya saya tere pesh-o-pas raha hun main

nafas ki aamad-o-shud bhi hai sanehe ki tarah

gawah rah ki tera ham-nafas raha hun main

jahan bhi nur mila khil uTha shafaq ki tarah

jahan bhi aag mili KHar-o-KHas raha hun main