koi soche na hamein koi pukara na kare

koī soche na hameñ koī pukārā na kare

ham kahīñ haiñ ki nahīñ haiñ koī charchā na kare

raat afsūñ hai kahīñ kā nahīñ rahne detī

din ko so.e na koī raat ko jaagā na kare

ham nikal aa.e haiñ ab dhuup meñ jalne ke liye

koī bādal nahīñ bheje koī saaya na kare

an-ginat āñkhoñ meñ ham jalte rahe bujhte rahe

ab bhale ḳhvāb hamārā koī dekhā na kare

ham ne ik shahr basā rakkhā hai dīvāroñ meñ

kaam jo dil ne kiyā chashm-e-tamāshā na kare

koī ab jā ke zarā dekhe to us miTTī ko

aise sairāb kiyā hai koī dariyā na kare

go farāmoshī kī takmīl huā chāhtī hai

phir bhī kah do ki hameñ yaad vo aayā na kare

ham use ranj-e-tamannā se to bhar sakte haiñ

aur ye dil hai ki ab koī taqāzā na kare

vaar karnā hai agar ham pe to vo khul kar aa.e

aur bhūle se bhī ye kaam vo tanhā na kare

koi soche na hamein koi pukara na kare

hum kahin hain ki nahin hain koi charcha na kare

raat afsun hai kahin ka nahin rahne deti

din ko soe na koi raat ko jaga na kare

hum nikal aae hain ab dhup mein jalne ke liye

koi baadal nahin bheje koi saya na kare

an-ginat aankhon mein hum jalte rahe bujhte rahe

ab bhale KHwab hamara koi dekha na kare

hum ne ek shahr basa rakkha hai diwaron mein

kaam jo dil ne kiya chashm-e-tamasha na kare

koi ab ja ke zara dekhe to us miTTi ko

aise sairab kiya hai koi dariya na kare

go faramoshi ki takmil hua chahti hai

phir bhi kah do ki hamein yaad wo aaya na kare

hum use ranj-e-tamanna se to bhar sakte hain

aur ye dil hai ki ab koi taqaza na kare

war karna hai agar hum pe to wo khul kar aae

aur bhule se bhi ye kaam wo tanha na kare