koi sitara-e-girdab aashna tha main

koī sitāra-e-girdāb āshnā thā maiñ

ki mauj mauj añdheroñ meñ Dūbtā thā maiñ

us ek chehre meñ ābād the ka.ī chehre

us ek shaḳhs meñ kis kis ko dekhtā thā maiñ

na.e sitāre mirī raushnī meñ chalte the

charāġh thā ki sar-e-rāh jal rahā thā maiñ

safar meñ 'ishq ke ik aisā marhala aayā

vo DhūñDtā thā mujhe aur kho gayā thā maiñ

tamām 'umr kā hāsil sarāb o tishna-labī

mirā qusūr yahī thā ki sochtā thā maiñ

bigaḌ rahā thā maiñ duniyā ke zāviye se magar

ik aur zāviya thā jis se ban rahā thā maiñ

nahīñ rahā maiñ tire rāste kā patthar bhī

vo din bhī the tire ehsās meñ ḳhudā thā maiñ

mujhe gila na kisī sañg kā na aahan kā

usī ne toḌ diyā jis kā ā.īna thā maiñ

koi sitara-e-girdab aashna tha main

ki mauj mauj andheron mein Dubta tha main

us ek chehre mein aabaad the kai chehre

us ek shaKHs mein kis kis ko dekhta tha main

nae sitare meri raushni mein chalte the

charagh tha ki sar-e-rah jal raha tha main

safar mein 'ishq ke ek aisa marhala aaya

wo DhunDta tha mujhe aur kho gaya tha main

tamam 'umr ka hasil sarab o tishna-labi

mera qusur yahi tha ki sochta tha main

bigaD raha tha main duniya ke zawiye se magar

ek aur zawiya tha jis se ban raha tha main

nahin raha main tere raste ka patthar bhi

wo din bhi the tere ehsas mein KHuda tha main

mujhe gila na kisi sang ka na aahan ka

usi ne toD diya jis ka aaina tha main