kiya hai dil ne begana jahan-e-murgh-o-mahi se

kiyā hai dil ne begāna jahān-e-murġh-o-māhī se

hameñ jāgīr-e-āzādī milī darbār-e-shāhī se

khilā hai ġhuncha-e-hairat havā-e-gāh-gāhī se

hue majzūb rafta rafta us kī kam-nigāhī se

tirī duniyā meñ ai dil ham bhī ik goshe meñ rahte haiñ

hameñ bhī kuchh ummīdeñ haiñ tirī ālam-panāhī se

re.āyā meñ shahanshāh-e-junūñ kī ham bhī dāḳhil haiñ

hameñ bhī kuchh na kuchh nisbat to hai zill-e-ilāhī se

hue haiñ bas-ki bai.at us nazar ke ḳhānvāde meñ

faqīrī se ta.alluq hai na matlab bādshāhī se

kiyā hai us nazar ne sarfarāz ahl-e-mohabbat ko

kisī ko tāj-dārī se kisī ko be-kulāhī se

kahāñ vo ḳhānumāñ-barbādi-e-ishq aur kahāñ ye ham

phirā karte haiñ yūñhī dar-ba-dar vaahī tabāhī se

kiya hai dil ne begana jahan-e-murgh-o-mahi se

hamein jagir-e-azadi mili darbar-e-shahi se

khila hai ghuncha-e-hairat hawa-e-gah-gahi se

hue majzub rafta rafta us ki kam-nigahi se

teri duniya mein ai dil hum bhi ek goshe mein rahte hain

hamein bhi kuchh ummiden hain teri aalam-panahi se

reaya mein shahanshah-e-junun ki hum bhi daKHil hain

hamein bhi kuchh na kuchh nisbat to hai zill-e-ilahi se

hue hain bas-ki baiat us nazar ke KHanwade mein

faqiri se talluq hai na matlab baadshahi se

kiya hai us nazar ne sarfaraaz ahl-e-mohabbat ko

kisi ko taj-dari se kisi ko be-kulahi se

kahan wo KHanuman-barbaadi-e-ishq aur kahan ye hum

phira karte hain yunhi dar-ba-dar wahi tabahi se