KHub honi hai ab is shahr mein ruswai meri

ḳhuub honī hai ab is shahr meñ rusvā.ī mirī

beach bāzār ubhar aa.ī hai tanhā.ī mirī

ek baar us ne bulāyā thā to masrūf thā maiñ

jīte-jī phir kabhī baarī hī nahīñ aa.ī mirī

apnī ta.amīr ke malbe se paTā jaatā huuñ

aur pāyāb huī jaatī hai tanhā.ī mirī

ḳhāna-e-vasl azā-ḳhāna-e-hastī ki jahāñ

gūñjtī rahtī hai bas dard kī shahnā.ī mirī

dasht-e-ḳhāmoshī meñ chaltī hai bahut tez havā

duur tak uḌtī huī gard hai goyā.ī mirī

zindagī saal chha-māhī tū milā kar aa kar

ġhairiyat itnī bhalā kis liye māñ-jā.ī mirī

munjamid ho gayā saarā mut.harrik merā

mere paanī pe jamī baiThī hai ab kaa.ī mirī

'farhat-ehsās' taġhazzul se sharābor huā

raat āġhosh meñ kuchh yuuñ ye ġhazal aa.ī mirī

KHub honi hai ab is shahr mein ruswai meri

beach bazar ubhar aai hai tanhai meri

ek bar us ne bulaya tha to masruf tha main

jite-ji phir kabhi bari hi nahin aai meri

apni tamir ke malbe se paTa jata hun

aur payab hui jati hai tanhai meri

KHana-e-wasl aza-KHana-e-hasti ki jahan

gunjti rahti hai bas dard ki shahnai meri

dasht-e-KHamoshi mein chalti hai bahut tez hawa

dur tak uDti hui gard hai goyai meri

zindagi sal chha-mahi tu mila kar aa kar

ghairiyat itni bhala kis liye man-jai meri

munjamid ho gaya sara mutharrik mera

mere pani pe jami baiThi hai ab kai meri

'farhat-ehsas' taghazzul se sharabor hua

raat aaghosh mein kuchh yun ye ghazal aai meri