dur kyun jaun yahin jalwa-numa baiTha hai

duur kyuuñ jā.ūñ yahīñ jalva-numā baiThā hai

dil mirā arsh hai aur us pe ḳhudā baiThā hai

but-kade meñ tire jalve ne tarāshe patthar

jis ne dekhā yahī jaanā ki ḳhudā baiThā hai

kyā hue aañkh ke parde jo paḌe the ab tak

barmalā hashr meñ kyuuñ aaj ḳhudā baiThā hai

naqsh-e-vahdat hī suvaidā ko kahā karte haiñ

dil meñ ik til hai aur us til meñ ḳhudā baiThā hai

maiñ jo kahtā huuñ ki ka.abe ko na barbād karo

hañs ke but kahte haiñ kyā dil meñ ḳhudā baiThā hai

āsmāñ maiñ tirī gardish se nahīñ Dartā huuñ

tujh ko kis baat kā ġham sar pe ḳhudā baiThā hai

chashm-e-vahdat se jo insān zarā ġhaur kare

jis ko dekhe yahī samjhe ki ḳhudā baiThā hai

apne marne kā zarā ġham na karo tum 'muztar'

yuuñ samajh lo ki jilāne ko ḳhudā baiThā hai

dur kyun jaun yahin jalwa-numa baiTha hai

dil mera arsh hai aur us pe KHuda baiTha hai

but-kade mein tere jalwe ne tarashe patthar

jis ne dekha yahi jaana ki KHuda baiTha hai

kya hue aankh ke parde jo paDe the ab tak

barmala hashr mein kyun aaj KHuda baiTha hai

naqsh-e-wahdat hi suwaida ko kaha karte hain

dil mein ek til hai aur us til mein KHuda baiTha hai

main jo kahta hun ki kabe ko na barbaad karo

hans ke but kahte hain kya dil mein KHuda baiTha hai

aasman main teri gardish se nahin Darta hun

tujh ko kis baat ka gham sar pe KHuda baiTha hai

chashm-e-wahdat se jo insan zara ghaur kare

jis ko dekhe yahi samjhe ki KHuda baiTha hai

apne marne ka zara gham na karo tum 'muztar'

yun samajh lo ki jilane ko KHuda baiTha hai