KHud pe ilzam dhar gaya hun main

ḳhud pe ilzām dhar gayā huuñ maiñ

kaam mushkil thā kar gayā huuñ maiñ

kaisī dahshat se bhar gayā huuñ maiñ

ḳhvāb meñ jaise Dar gayā huuñ maiñ

jaane kis shai kī hai talāsh mujhe

kū-ba-kū dar-ba-dar gayā huuñ maiñ

mujh ko ab kaise pā sakegā koī

vaqt thā aur guzar gayā huuñ maiñ

mere chāroñ taraf añdherā hai

kyā batā.ūñ kidhar gayā huuñ maiñ

kal bhī kuchh dard kam na thā lekin

aaj to jaise mar gayā huuñ maiñ

ab zamīñ par na jaane kyā hogā

āsmāñ se utar gayā huuñ maiñ

be-ḳhabar hī jahāñ meñ aayā thā

aur yūñhī be-ḳhabar gayā huuñ maiñ

ba.ad muddat ke ḳhud ko yaad aayā

ba.ad muddat ke ghar gayā huuñ maiñ

garche mahdūd thā magar 'shāriq'

shash-jihat meñ bikhar gayā huuñ maiñ

KHud pe ilzam dhar gaya hun main

kaam mushkil tha kar gaya hun main

kaisi dahshat se bhar gaya hun main

KHwab mein jaise Dar gaya hun main

jaane kis shai ki hai talash mujhe

ku-ba-ku dar-ba-dar gaya hun main

mujh ko ab kaise pa sakega koi

waqt tha aur guzar gaya hun main

mere chaaron taraf andhera hai

kya bataun kidhar gaya hun main

kal bhi kuchh dard kam na tha lekin

aaj to jaise mar gaya hun main

ab zamin par na jaane kya hoga

aasman se utar gaya hun main

be-KHabar hi jahan mein aaya tha

aur yunhi be-KHabar gaya hun main

baad muddat ke KHud ko yaad aaya

baad muddat ke ghar gaya hun main

garche mahdud tha magar 'shaariq'

shash-jihat mein bikhar gaya hun main