tamam umr husn-e-e’tibar dekhte rahe

tamām 'umr husn-e-e’tibār dekhte rahe

ham aaj bhī kisī kā intizār dekhte rahe

kalī kā husn phuul kā nikhār dekhte rahe

ḳhizāñ-nasīb jalva-e-bahār dekhte rahe

na-jāne kyuuñ ba-chashm-e-ashk-bār dekhte rahe

ham aaj un kī samt baar baar dekhte rahe

thake thake se rāh-rau thakī thakī nigāh se

guzar gayā jo kārvāñ ġhubār dekhte rahe

gumāñ kī sarhadoñ pe bhī hameñ tirā yaqīñ rahā

palaT palaT ke terī rah-guzār dekhte rahe

haram se le ke but-kade kī raah tak har ek sū

jidhar uThī nigāh ḳhalfashār dekhte rahe

bhañvar meñ 'muztar'-e-hazīñ kī naav Dūbtī rahī

nazar bachā bachā ke ġham-gusār dekhte rahe

tamam 'umr husn-e-e’tibar dekhte rahe

hum aaj bhi kisi ka intizar dekhte rahe

kali ka husn phul ka nikhaar dekhte rahe

KHizan-nasib jalwa-e-bahaar dekhte rahe

na-jaane kyun ba-chashm-e-ashk-bar dekhte rahe

hum aaj un ki samt bar bar dekhte rahe

thake thake se rah-rau thaki thaki nigah se

guzar gaya jo karwan ghubar dekhte rahe

guman ki sarhadon pe bhi hamein tera yaqin raha

palaT palaT ke teri rah-guzar dekhte rahe

haram se le ke but-kade ki rah tak har ek su

jidhar uThi nigah KHalfashaar dekhte rahe

bhanwar mein 'muztar'-e-hazin ki naw Dubti rahi

nazar bacha bacha ke gham-gusar dekhte rahe