KHizan mein aag lagao bahaar ke din hain

ḳhizāñ meñ aag lagāo bahār ke din haiñ

na.e shagūfe khilāo bahār ke din haiñ

ulaT do taḳhta ḳhizāñ kī tabāh-kārī kā

bisāt-e-aish bichhāo bahār ke din haiñ

ezār-e-gul kī dahak se jalā ke kāñToñ ko

lagī diloñ kī bujhāo bahār ke din haiñ

milā ke qatra-e-shabnam meñ rañg o nik.hat-e-gul

koī sharāb banāo bahār ke din haiñ

bhare kaTore chaman ke ye dars dete haiñ

chhalakte jaam luñDhāo bahār ke din haiñ

ab ehtiyāt-pasandī hai sa.i-e-nā-mashkūr

matā-e-zabt luTāo bahār ke din haiñ

sharār-e-gul se zamāne meñ shole bhaḌkā do

hasīn fitne jagāo bahār ke din haiñ

junūn-e-shauq kī be-e'tidāliyoñ ke ḳhilāf

koī dalīl na laao bahār ke din haiñ

purānī sham.eñ bujhā diiñ sabā ke jhoñkoñ ne

na.e charāġh jalāo bahār ke din haiñ

lachak rahī hai vafūr-e-samar se shāḳh-e-hayāt

ye baar hañs ke uThāo bahār ke din haiñ

janāb-e-aḳhtar-e-jāñ-dāda-e-ruḳh-e-gul ko

imām-e-vaqt banāo bahār ke din haiñ

KHizan mein aag lagao bahaar ke din hain

nae shagufe khilao bahaar ke din hain

ulaT do taKHta KHizan ki tabah-kari ka

bisat-e-aish bichhao bahaar ke din hain

ezar-e-gul ki dahak se jala ke kanTon ko

lagi dilon ki bujhao bahaar ke din hain

mila ke qatra-e-shabnam mein rang o nikhat-e-gul

koi sharab banao bahaar ke din hain

bhare kaTore chaman ke ye dars dete hain

chhalakte jam lunDhao bahaar ke din hain

ab ehtiyat-pasandi hai sai-e-na-mashkur

mata-e-zabt luTao bahaar ke din hain

sharar-e-gul se zamane mein shole bhaDka do

hasin fitne jagao bahaar ke din hain

junun-e-shauq ki be-e'tidaliyon ke KHilaf

koi dalil na lao bahaar ke din hain

purani shamen bujha din saba ke jhonkon ne

nae charagh jalao bahaar ke din hain

lachak rahi hai wafur-e-samar se shaKH-e-hayat

ye bar hans ke uThao bahaar ke din hain

janab-e-aKHtar-e-jaan-dada-e-ruKH-e-gul ko

imam-e-waqt banao bahaar ke din hain