matlub zindagi ko abhi imtihan nahin

matlūb zindagī ko abhī imtihāñ nahīñ

ab tak matā'-e-dard se dil bad-gumāñ nahīñ

jo barg-e-ḳhushk tund havāoñ kī zad pe thā

vo āshnā-e-rāz kahāñ hai kahāñ nahīñ

lahje kī dhaar dil meñ utartī chalī ga.ī

ye un kī baat hai jo kabhī sargirāñ nahīñ

dekho to har jabīñ pe hai ik āshnā sī dhuup

socho to ās-pās koī rāz-dāñ nahīñ

chehroñ kā rang dekh nigāhoñ kī baat sun

vo be-zabāñ nahīñ jo tire ham-zabāñ nahīñ

har lamha ik sadī sā guzartā hai dosto

dil ko shikāyat-e-nafas-e-rā.egāñ nahīñ

ḳhāmoshiyoñ kī dhund meñ ghuTne lagā hai dam

shab kā safar tavīl hai afsāna-ḳhvāñ nahīñ

dīvār-e-shab vahī hai jamāl-e-sahar vahī

shīshe nahīñ rahe haiñ ki sang-e-girāñ nahīñ

ham se hī kab nigāh uThā.ī ga.ī 'adā'

varna ġhubār-e-shām-e-alam be-karāñ nahīñ

matlub zindagi ko abhi imtihan nahin

ab tak mata'-e-dard se dil bad-guman nahin

jo barg-e-KHushk tund hawaon ki zad pe tha

wo aashna-e-raaz kahan hai kahan nahin

lahje ki dhaar dil mein utarti chali gai

ye un ki baat hai jo kabhi sargiran nahin

dekho to har jabin pe hai ek aashna si dhup

socho to aas-pas koi raaz-dan nahin

chehron ka rang dekh nigahon ki baat sun

wo be-zaban nahin jo tere ham-zaban nahin

har lamha ek sadi sa guzarta hai dosto

dil ko shikayat-e-nafas-e-raegan nahin

KHamoshiyon ki dhund mein ghuTne laga hai dam

shab ka safar tawil hai afsana-KHwan nahin

diwar-e-shab wahi hai jamal-e-sahar wahi

shishe nahin rahe hain ki sang-e-giran nahin

hum se hi kab nigah uThai gai 'ada'

warna ghubar-e-sham-e-alam be-karan nahin