کیسے آ پہنچی ہے گلشن کی ہوا زنداں میں

کیسے آ پہنچی ہے گلشن کی ہوا زنداں میں

دل کا جو زخم تھا اک پھول بنا زنداں میں

ایسا دلکش تھا کہ تھی موت بھی منظور ہمیں

ہم نے جس جرم کی کاٹی ہے سزا زنداں میں

میں گلستاں میں بھی تنہا تھا مگر یاد تو تھی

کیسا بے یار و مددگار ہوا زنداں میں

میں نے تنہائی سے تنگ آ کے اسے یاد کیا

اب مرے ساتھ ہی رہتا ہے خدا زنداں میں

وہ جو گلشن میں مرے غم کا مداوا نہ ہوا

چاند نکلا تو اسے یاد کیا زنداں میں

آج جب آنکھ کھلی ہے تو فضا ہے خاموش

صبح دم کون سوئے دار گیا زنداں میں