kabhi KHuda kabhi insan rok leta hai

kabhī ḳhudā kabhī insān rok letā hai

maiñ jab bhī jaatā huuñ darbān rok letā hai

baġhair chaak kiye ghar se maiñ agar niklūñ

to mujh ko merā garebān rok letā hai

maiñ jab bhī jism se izn-e-vidā.a māñgtā huuñ

vo kah ke mujh ko mirī jaan rok letā hai

bas ek jast meñ duniyā ke paar utar jā.ūñ

magar mujhe merā sāmān rok letā hai

bahāna chāhiye mujh ko bhī koī rukne kā

so vo ba-hīla-e-āsān rok letā hai

maiñ apne kufr se sharminda huuñ ki us kī taraf

mire qadam mirā īmān rok letā hai

farār ho ga.ī hotī kabhī kī ruuh mirī

bas ek jism kā ehsān rok letā hai

kabhī to ā.eñge 'ehsās-jī' kī bai.at meñ

hameñ yahī bas ik imkān rok letā hai

kabhi KHuda kabhi insan rok leta hai

main jab bhi jata hun darban rok leta hai

baghair chaak kiye ghar se main agar niklun

to mujh ko mera gareban rok leta hai

main jab bhi jism se izn-e-widaa mangta hun

wo kah ke mujh ko meri jaan rok leta hai

bas ek jast mein duniya ke par utar jaun

magar mujhe mera saman rok leta hai

bahana chahiye mujh ko bhi koi rukne ka

so wo ba-hila-e-asan rok leta hai

main apne kufr se sharminda hun ki us ki taraf

mere qadam mera iman rok leta hai

farar ho gai hoti kabhi ki ruh meri

bas ek jism ka ehsan rok leta hai

kabhi to aaenge 'ehsas-ji' ki baiat mein

hamein yahi bas ek imkan rok leta hai