kabhi khole to kabhi zulf ko bikhrae hai

kabhī khole to kabhī zulf ko bikhrā.e hai

zindagī shaam hai aur shaam Dhalī jaa.e hai

har ḳhushī mom kī guḌiyā hai muqaddas guḌiyā

taaj sho.aloñ kā zamāna jise pahnā.e hai

ḳhāmushī kyā kisī gumbad kī fazā hai jis meñ

guuñj ke merī hī āvāz palaT aa.e hai

zindagī pūchhe hai ro kar kisī beva kī tarah

chūḌiyāñ kaun mire haath meñ pahnā.e hai

dil kisī jām-e-labālab kī tarah lahrā kar

phir tire dast-e-hinā.ī meñ chhalak jaa.e hai

kaun samjhe mire iḳhlās kī azmat ko bhalā

maiñ vo dariyā huuñ jo qatre meñ samā jaa.e hai

'prem' dekho to sahī zaḳhmoñ ke zevar kī phaban

shā.erī ban ke dulhan aur bhī sharmā.e hai

kabhi khole to kabhi zulf ko bikhrae hai

zindagi sham hai aur sham Dhali jae hai

har KHushi mom ki guDiya hai muqaddas guDiya

taj shoalon ka zamana jise pahnae hai

KHamushi kya kisi gumbad ki faza hai jis mein

gunj ke meri hi aawaz palaT aae hai

zindagi puchhe hai ro kar kisi bewa ki tarah

chuDiyan kaun mere hath mein pahnae hai

dil kisi jam-e-labaalab ki tarah lahra kar

phir tere dast-e-hinai mein chhalak jae hai

kaun samjhe mere iKHlas ki azmat ko bhala

main wo dariya hun jo qatre mein sama jae hai

'prem' dekho to sahi zaKHmon ke zewar ki phaban

shaeri ban ke dulhan aur bhi sharmae hai