kar-gah-e-duniya ki nesti bhi hasti hai

kār-gāh-e-duniyā kī nestī bhī hastī hai

ik taraf ujaḌtī hai ek samt bastī hai

be-diloñ kī hastī kyā jiite haiñ na marte haiñ

ḳhvāb hai na bedārī hosh hai na mastī hai

kyā batā.ūñ kyā huuñ maiñ qudrat-e-ḳhudā huuñ maiñ

merī ḳhud-parastī bhī ain haq-parastī hai

kīmiyā-e-dil kyā hai ḳhaak hai magar kaisī

lījiye to mahñgī hai bechiye to sastī hai

ḳhizr-e-manzil apnā huuñ apnī raah chaltā huuñ

mere haal par duniyā kyā samajh ke hañstī hai

kyā kahūñ safar apnā ḳhatm kyuuñ nahīñ hotā

fikr kī bulandī yā hausle kī pastī hai

husn-e-be-tamāshā kī dhuum kyā muammā hai

kaan bhī haiñ nā-mahram aañkh bhī tarastī hai

chitvanoñ se miltā hai kuchh surāġh bātin kā

chaal se to kāfir par sādgī barastī hai

tark-e-lazzat-e-duniyā kījiye to kis dil se

zauq-e-pārsā.ī kyā faiz-e-tañg-dastī hai

dīdanī hai 'yās' apne ranj o ġham kī tuġhyānī

jhuum jhuum kar kyā kyā ye ghaTā barastī hai

kar-gah-e-duniya ki nesti bhi hasti hai

ek taraf ujaDti hai ek samt basti hai

be-dilon ki hasti kya jite hain na marte hain

KHwab hai na bedari hosh hai na masti hai

kya bataun kya hun main qudrat-e-KHuda hun main

meri KHud-parasti bhi ain haq-parasti hai

kimiya-e-dil kya hai KHak hai magar kaisi

lijiye to mahngi hai bechiye to sasti hai

KHizr-e-manzil apna hun apni rah chalta hun

mere haal par duniya kya samajh ke hansti hai

kya kahun safar apna KHatm kyun nahin hota

fikr ki bulandi ya hausle ki pasti hai

husn-e-be-tamasha ki dhum kya muamma hai

kan bhi hain na-mahram aankh bhi tarasti hai

chitwanon se milta hai kuchh suragh baatin ka

chaal se to kafir par sadgi barasti hai

tark-e-lazzat-e-duniya kijiye to kis dil se

zauq-e-parsai kya faiz-e-tang-dasti hai

didani hai 'yas' apne ranj o gham ki tughyani

jhum jhum kar kya kya ye ghaTa barasti hai