kaam diwanon ko shahron se na bazaron se

kaam dīvānoñ ko shahroñ se na bāzāroñ se

mast haiñ ālam-e-ījād ke nazzāroñ se

zulfeñ bal khātī haiñ yā jhūmtī hai kaalī ghaTā

bārish-e-nūr hai har sū tire ruḳhsāroñ se

vaañ naqāb uTThī yahāñ chāñdnī ne khet kiyā

kaT ga.ī zulmat-e-shab chāñd se ruḳhsāroñ se

dekhtā rah gayā ā.īna kisī kī sūrat

zulfeñ aTkheliyāñ kartī rahīñ ruḳhsāroñ se

dekheñ kis tarah basar hote haiñ ayyām-e-junūñ

yaañ to hai sāmnā har dam inhīñ ġham-ḳhvāroñ se

haath uljhā hai garebāñ meñ khaḌe dekhte haiñ

aur ummīd koī kyā kare ġham-ḳhvāroñ se

kashish-e-dasht-e-balā hubb-e-vatan dāman-gīr

aaj ghar chhuTtā hai pahle-pahal āvāroñ se

marte dam tak tirī talvār kā dam bharte rahe

haq adā ho na sakā phir bhī vafādāroñ se

be-dhaḌak pichhle pahar nāla-o-shevan na kareñ

kah de itnā to koī tāza-giraftāroñ se

mausam-e-gul nahīñ paiġhām-e-ajal thā sayyād

dekh ḳhālī hai qafas aaj giraftāroñ se

kyā burā haal hai añgḌā.iyāñ lete lete

sāqiyā naaz ab achchhā nahīñ mai-ḳhvāroñ se

kāñpte hāthoñ se sāġhar ko bachāyā to bahut

kyā kaheñ ḳhud hī na sambhlā gayā mai-ḳhvāroñ se

sar ko Takrā ke gayā hai koī sahrā kī taraf

ḳhuun sābit hai abhī shahr kī dīvāroñ se

eḌiyāñ vādi-e-ġhurbat meñ ragaḌte hī rahe

duur khiñchtī ga.ī manzil vatan-āvāroñ se

kaan meñ pichhle pahar aa.ī ik āvāz-e-hazīñ

ab to ġham-ḳhvār bhī diq haiñ tire bīmāroñ se

jhilmilāne lagā jab 'yās' charāġh-e-saharī

phir to Thahrā na gayā hijr ke bīmāroñ se

kaam diwanon ko shahron se na bazaron se

mast hain aalam-e-ijad ke nazzaron se

zulfen bal khati hain ya jhumti hai kali ghaTa

barish-e-nur hai har su tere ruKHsaron se

wan naqab uTThi yahan chandni ne khet kiya

kaT gai zulmat-e-shab chand se ruKHsaron se

dekhta rah gaya aaina kisi ki surat

zulfen aTkheliyan karti rahin ruKHsaron se

dekhen kis tarah basar hote hain ayyam-e-junun

yan to hai samna har dam inhin gham-KHwaron se

hath uljha hai gareban mein khaDe dekhte hain

aur ummid koi kya kare gham-KHwaron se

kashish-e-dasht-e-bala hubb-e-watan daman-gir

aaj ghar chhuTta hai pahle-pahal aawaron se

marte dam tak teri talwar ka dam bharte rahe

haq ada ho na saka phir bhi wafadaron se

be-dhaDak pichhle pahar nala-o-shewan na karen

kah de itna to koi taza-giraftaron se

mausam-e-gul nahin paigham-e-ajal tha sayyaad

dekh KHali hai qafas aaj giraftaron se

kya bura haal hai angDaiyan lete lete

saqiya naz ab achchha nahin mai-KHwaron se

kanpte hathon se saghar ko bachaya to bahut

kya kahen KHud hi na sambhla gaya mai-KHwaron se

sar ko Takra ke gaya hai koi sahra ki taraf

KHun sabit hai abhi shahr ki diwaron se

eDiyan wadi-e-ghurbat mein ragaDte hi rahe

dur khinchti gai manzil watan-awaron se

kan mein pichhle pahar aai ek aawaz-e-hazin

ab to gham-KHwar bhi diq hain tere bimaron se

jhilmilane laga jab 'yas' charagh-e-sahari

phir to Thahra na gaya hijr ke bimaron se